पेट्रोलियम कंपन्यांनी दरवाढीचा धडाका लावला,देशात पेट्रोल-डिझेल पुन्हा महागले! अवघ्या ४ दिवसांत दुसरी इंधन दरवाढ!

सर्वसामान्यांच्या खिशाला पुन्हा एकदा कात्री लागली आहे. आंतरराष्ट्रीय बाजारात कच्च्या तेलाच्या किंमतीत झालेल्या वाढीमुळे देशांतर्गत बाजारात पेट्रोल आणि डिझेलच्या दरांनी पुन्हा एकदा उचल खाल्ली आहे.

मंगळवारी (१९ मे २०२६) देशभरात पेट्रोल आणि डिझेलच्या दरात सरासरी ९० पैशांची वाढ करण्यात आली आहे. इंधनाच्या दरात चालू आठवड्यात झालेली ही दुसरी दरवाढ आहे. यामुळे ऐन उन्हाळ्यात महागाईची झळ सोसणाऱ्या सर्वसामान्यांचे बजेट कोलमडण्याची शक्यता निर्माण झाली आहे.

यापूर्वी गेल्या शुक्रवारीच पेट्रोल आणि डिझेलच्या दरात थेट ३ रुपयांची मोठी वाढ करण्यात आली होती. त्यानंतर आता अवघ्या काही दिवसांतच पुन्हा ९० पैशांची वाढ झाल्याने महागाईचा भडका उडण्याची शक्यता वर्तवली जात आहे.

मुंबईत पेट्रोल १०७ रुपयांच्या पार, डिझेलही महागले

महाराष्ट्राची राजधानी मुंबईत इंधनाचे दर नेहमीच इतर मेट्रो शहरांच्या तुलनेत चढे असतात. मंगळवारच्या दरवाढीनंतर मुंबईत पेट्रोल ९१ पैशांनी महागले असून, आता एक लीटर पेट्रोलसाठी मुंबईकरांना १०७.५९ रुपये मोजावे लागत आहेत. तर दुसरीकडे डिझेलच्या दरात ९४ पैशांची वाढ झाली असून, मुंबईत डिझेल ९४.०८ रुपये प्रतिलीटरवर पोहोचले आहे.

देशाची राजधानी दिल्लीमध्ये पेट्रोल ८७ पैशांनी महागून ९८.६४ रुपये प्रतिलीटर झाले आहे, तर डिझेल ९१ पैशांच्या वाढीसह ९१.५८ रुपये प्रतिलीटरवर विकले जात आहे. कोलकातामध्ये पेट्रोलमध्ये सर्वाधिक म्हणजेच ९६ पैशांची वाढ झाली असून तिथे पेट्रोलचा दर १०९.७० रुपयांवर पोहोचला आहे.
आठवड्याभरात ३.९० रुपयांची वाढ

पाच राज्यांच्या विधानसभा निवडणुकांनंतर इंधन दरवाढीचे सत्र पुन्हा सुरू होईल, अशी शक्यता आधीपासूनच वर्तवली जात होती. त्यानुसार आता पेट्रोलियम कंपन्यांनी दरवाढीचा धडाका लावला आहे. शुक्रवारी झालेली ३ रुपयांची वाढ आणि आजची ९० पैशांची वाढ मिळून, सर्वसामान्यांवर अवघ्या एका आठवड्यात प्रतिलिटर ३ रुपये ९० पैशांचा अतिरिक्त बोजा पडला आहे.

प्रमुख महानगरांमधील पेट्रोल आणि डिझेलचे नवे दर (१९ मे २०२६)

देशातील चार प्रमुख महानगरांमध्ये आजपासून लागू झालेले पेट्रोल आणि डिझेलचे प्रतिलीटर दर खालीलप्रमाणे आहेत :

शहर पेट्रोलची नवी किंमत
(प्रतिलीटर) झालेली वाढ डिझेलची नवी किंमत (प्रतिलीटर) झालेली वाढ

मुंबई ₹ १०७.५९ + ९१ पैसे ₹ ९४.०८ + ९४ पैसे
दिल्ली ₹ ९८.६४ + ८७ पैसे ₹ ९१.५८ + ९१ पैसे
कोलकाता ₹ १०९.७० + ९६ पैसे ₹ ९६.०७ + ९४ पैसे
चेन्नई ₹ १०४.४९ + ८२ पैसे ₹ ९६.११ + ८६ पैसे
या दरवाढीमुळे केवळ वाहनधारकांनाच फटका बसणार नाही, तर डिझेल महागल्यामुळे मालवाहतुकीचा खर्च वाढणार आहे. परिणामी, येत्या काळात भाजीपाला, दूध आणि इतर जीवनावश्यक वस्तूही महागण्याची शक्यता असून, याचा थेट परिणाम सर्वसामान्यांच्या बजेटवर होणार आहे. स्थानिक कर आणि व्हॅट (VAT) मधील फरकामुळे महाराष्ट्रातील विविध शहरांमध्ये हे दर आणखी काही रुपयांनी जास्त असणार आहेत.