खेड बसस्थानक परिसरात खराब भाजीची विक्री होत असल्याचा आरोप!

निवडलेली व नाशवंत भाजी पुन्हा विक्रीसाठी आणली जात असल्याची ग्राहकांची तक्रार; नगर परिषद प्रशासनाने तातडीने लक्ष देण्याची मागणी

खेड : खेड शहरातील भाजी मंडईमध्ये विक्रीसाठी येणाऱ्या भाज्यांची साफसफाई आणि निवड करताना खराब व नाशवंत झालेली भाजी बाजूला काढली जाते. मात्र, अशा प्रकारे निवडून काढलेली भाजी पुन्हा गोळा करून खेड बसस्थानक परिसरात विक्रीसाठी आणली जात असल्याचा गंभीर आरोप जागरूक ग्राहकांकडून करण्यात येत आहे. या प्रकारामुळे ग्राहकांची फसवणूक होण्याबरोबरच नागरिकांच्या आरोग्याचाही प्रश्न निर्माण झाला आहे.
खेडच्या भाजी मंडईमध्ये तालुक्यातील विविध गावांसह बाहेरील भागांतून मोठ्या प्रमाणात भाजी विक्रीसाठी आणली जाते. या भाज्यांची साफसफाई आणि निवड करण्याचे काम काही महिला करतात. या प्रक्रियेदरम्यान खराब झालेली, सडलेली अथवा नाशवंत भाजी वेगळी काढली जाते. मात्र, ग्राहकांच्या म्हणण्यानुसार, यातील काही भाजी पुन्हा गोळा करून बसस्थानक परिसरातील आवारात विक्रीसाठी ठेवली जात असल्याचा प्रकार निदर्शनास येत आहे.
काही ग्राहकांनी बसस्थानक परिसरातून भाजी खरेदी करून घरी नेल्यानंतर त्यामध्ये खराब आणि नाशवंत भाज्या आढळून आल्याची तक्रार केली आहे. त्यामुळे खरेदी केलेली भाजी वापरण्याऐवजी फेकून देण्याची वेळ ग्राहकांवर येत आहे. विशेष म्हणजे, अशा भाज्यांची विक्री होत असल्यास त्या खरेदी करणाऱ्या नागरिकांच्या आरोग्याला धोका निर्माण होण्याची शक्यता नाकारता येत नाही.
बसस्थानक परिसरात प्रवाशांची तसेच स्थानिक नागरिकांची मोठी वर्दळ असते. या ठिकाणी भाजी विक्री होत असल्याने अनेक ग्राहक सहजपणे भाजी खरेदी करतात. मात्र, विक्रीसाठी ठेवण्यात आलेल्या भाज्यांची गुणवत्ता तपासली जात नसल्यास ग्राहकांच्या आरोग्याशी खेळ होण्याची शक्यता आहे.
या पार्श्वभूमीवर खेड नगर परिषद प्रशासनाने या प्रकाराची गांभीर्याने दखल घेऊन बसस्थानक परिसरातील भाजी विक्रेत्यांची तपासणी करावी. विक्रीसाठी ठेवण्यात येणाऱ्या भाज्यांची गुणवत्ता तपासून खराब व नाशवंत भाज्यांची विक्री रोखण्यासाठी आवश्यक ती कारवाई करावी, अशी मागणी जागरूक ग्राहकांकडून करण्यात येत आहे.
दरम्यान, नागरिकांनीही भाजी खरेदी करताना तिचा ताजेपणा, गुणवत्ता आणि स्थिती यांची काळजीपूर्वक पाहणी करावी. केवळ स्वस्त दराच्या आमिषाला बळी न पडता चांगल्या दर्जाची भाजी खरेदी करावी, असे आवाहन जागरूक ग्राहकांकडून करण्यात येत आहे. आता या प्रकाराकडे नगर परिषद प्रशासन कितपत गांभीर्याने लक्ष देते, याकडे नागरिकांचे लक्ष लागले आहे.

Related Articles

Leave a Reply

Your email address will not be published. Required fields are marked *

Back to top button