जेईई परीक्षा केंद्राच्या परिसरात प्रतिबंधात्मक आदेश
रत्नागिरी, दि. 22 ): राष्ट्रीय परीक्षा एजेंसी, नवी दिल्ली यांच्यामार्फत घेण्यात येणारी JEE (Main) 2026 ची परीक्षा दि. 21,22,23,24,28 आणि 29 जानेवारी 2026 रोजी होत आहे. या दिवशी परीक्षा केंद्राच्या 200-300 मीटर परिसरात सकाळी 8 ते सायंकाळी 7 वाजेपर्यंत प्रतिबंधात्मक आदेश अपर जिल्हादंडाधिकारी चंद्रकांत सूर्यवंशी यांनी लागू केले आहेत.
राष्ट्रीय परीक्षा एजेंसी, नवी दिल्ली यांच्यामार्फत घेण्यात येणारी JEE (Main) 2026 ची परीक्षा जिल्ह्यातील राजेंद्र माने कॉलेज ऑफ इंजिनिअरिंग ॲन्ड टेक्नॉलॉजी, आंबव, ता. संगमेश्वर या परीक्षा केंद्रावर दि. 21, 22,23,24 आणि 28 जानेवारी 2026 रोजी पेपर -1 (बी.ई/बी.टेक) शिफ्ट -1 (सकाळी 9 ते दुपारी 12 वाजता) शिफ्ट 2 (दुपारी 3 ते 6 वाजता) आणि दि. 29 जानेवारी रोजी पेपर-2ए (बी.आर्क), पेपर आरबी (बी. प्लॅनिंग) आणि पेपर 26 आणि 2 बी (बी.आर्क ॲण्ड बी.प्लॅनिंग बोथ) शिफ्ट 1 ( सकाळी 9 ते दुपारी 12.30 वाजता या कालावधीत घेण्यात येणार आहे.
भारतीय नागरिक सुरक्षा संहिता 2023 चे कलम 163 प्रमाणे प्राप्त झालेल्या अधिकारान्वये जिल्ह्यातील राजेंद्र माने कॉलेज ऑफ इंजिनिअरींग ॲण्ड टेक्नॉलॉजी, आंबव, ता. संगमेश्वर या परीक्षा केंद्राच्या 200-300 मीटर परिसरात परीक्षेच्या दिवशी सकाळी 8 वा. ते सायंकाळी 7 वाजेपर्यंत प्रतिबंधात्मक आदेश अपर जिल्हादंडाधिकारी चंद्रकांत सूर्यवंशी यांनी लागू केले आहेत.
या आदेशानुसार परीक्षा केंद्राच्या परिसरात परिक्षार्थी अथवा अन्य व्यक्तीकडून शांततेस बाधा होईल असे कृत्य करण्यात येणार नाही. 200-300 मीटर परिसरातील एस.टी.डी. बुथ, झेरॉक्स सेंटर, टायपिंग सेंटर, ध्वनीक्षेपण, सायबर कॅफे, फोटोकॉपी इ. माध्यमे आदेशाची मुदत संपेपर्यंत बंद राहतील. परीक्षा केंद्राच्या परिसरात मोबाईल फोन, सेल्यूलर फोन, फॅक्स, ई-मेल व इतर प्रसार माध्यमे घेवून प्रवेश करण्यास मनाई असेल. कोणत्याही व्यक्तीकडून परीक्षा सुरळीतपणे व शांततेच्या वातावरणामध्ये पार पडण्यासाठी कोणतीही बाधा उत्पन्न करण्यास मनाई असेल. परीक्षा केंद्रावर कोणत्याही अनधिकृत व्यक्तीस / वाहनास प्रवेशास मनाई राहील.
हे आदेश परीक्षा केंद्रावर काम करणारे अधिकारी/कर्मचारी तसेच परीक्षा केंद्रावर निगराणी करणारे अधिकारी/पोलीस अधिकारी यांच्याबाबत त्यांचे परीक्षा संबंधी कर्तव्य पार पाडण्याच्या अनुषंगाने लागू राहणार नाहीत. मात्र, त्यांना गैरप्रकार करण्यास प्रतिबंध राहील.
या आदेशाची जो अवमान्यता करील तो भारतीय न्याय संहिता, 2023 चे कलम 223 प्रमाणे शिक्षेस पात्र राहील.
000
