डोनाल्ड ट्रम्प यांचं आधारकार्ड केलं प्रिंट! रोहित पवार यांचे खळबळजनक दावे!! मतचोरीचे मतदारसंघनिहाय आकडे दाखवले.

मुंबई : रोहित पवार यांनी स्फोटक पत्रकार परिषद घेतली. या पत्रकार परिषदेत त्यांनी मतचोरीचे गंभीर आरोप केले आहेत. या कथित आरोपांप्रकरणी त्यांनी कुठल्या मतदारसंघात किती फेक मतदार वाढले, याबाबत आकडा सांगितला आहे. तसेच त्यांनी एकाच व्यक्तीचे मतदार याद्यांमध्ये अनेक वेळा नाव असल्याचा दावा केला. त्यामुळे त्या व्यक्तीने अनेकदा मतदान केलं असावं, असा दावा रोहित पवार यांनी केला आहे.

राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी आज पत्रकार परिषद घेत मतचोरीचे गंभीर आरोप केले. रोहित पवार यांनी आज पत्रकार परिषदेत चक्क अमेरिकेचे अध्यक्ष डोनाल्ड ट्रम्प यांचं आधारकार्ड दाखवलं. डोनाल्ड ट्रम्प यांचं जसं आधारकार्ड काढलं आहे तसं अनेकांनी आधारकार्ड काढलं असेल आणि त्या आधावर मतदार ओळखपत्र बनवलं असेल, असा दावा रोहित पवार यांनी केला. तसेच विधानसभा निवडणुकीत विविध मतदारसंघांमध्ये किती मतदार वाढले याची सविस्तर माहिती देत मतचोरीचे गंभीर आरोप केले. रोहित पवार यांनी या आरोपांनंतर काही मागण्यादेखील मागितल्या आहेत.

“शिरुर विधानसभा मतदारसंघाचे 10230 नावे आहेत. वडगाव शेरीत 11064, खडकवासला येथून 12330, पर्वती मतदारसंघात 8238, हडपसर मतदारसंघात 12798 असे 54000 नावे वाढवली आहेत. आमचे कार्यकर्ते तिथे माणसं शोधायला गेली. पण एक सुद्धा माणूस तिथे सापडली नाहीत. अशोक पवार यांनी जसं सांगितलं की, बसने तिथे लोकं आणली. तिथे मतदान करुन घेतल्यानंतर परत त्यांना बसने पाठवलं. पैसे देवून लोकांना मतदानासाठी आणलं. मतदान करुन घेतलं आणि परत त्यांच्या मतदारसंघात पाठवलं. मी पिंपरीचं उदाहरण दाखवलं. तिथे 54000 मतदारांचा घोळ झालेला आहे”, असा आरोप रोहित पवार यांनी केला.

“खोलात जायचं झालं तर यामध्ये मेथडोलॉजी डिझाईन केली गेली. देवांग दवे माणसाने हे केलं. ते भाजपचे पदाधिकारी आहेत. ह्यांनी काय केलं? तर त्यांनी मेथडोलॉजीचा वापर केला. किती लोकांना काढायचं, कुणाला काढायचं, कुणाला घालायचं, टोटल को-ऑर्डिनेशन कसं करायचं, काय करायचं हे करण्यात आलं”, असा आरोप रोहित पवार यांनी केला.

“निवडणूक आयोग ही एक स्वायत्त संस्था आहे. या स्वायत्ता संस्थेचं इंटरनेट आणि त्यांची वेबसाईट सांभाळण्याची जबाबदारी दिवांग दवे नावाच्या व्यक्तीला निवडणूक आयोगाने दिली आहे. निवडणूक आयोगाच्या वेबसाईटवर सर्व माहिती असते. दवे भाजपचा पदाधिकारी असेल तर आमच्या आधी दवे यांच्याकडे सर्व माहिती होती. यादीत कुणाचं नाव घ्यायचं आणि कुणाचं नाव काढायचं हे दवेंनी त्या त्या मतदारसंघाच्या आमदारांना विश्वासात घेऊन केलं, असं आमचं ठाम मत आहे”, असा देखील गंभीर आरोप रोहित पवार यांनी केला.

“एवढी मोठी माहिती भाजपच्या पदाधिकाऱ्याला वेबसाईटच्या माध्यमातून मिळत असेल, आम्ही जेव्हा मागतो तेव्हा आम्हाला सांगितलं जातं की देत नाही. आमच्या नेत्यांना सांगितलं जातं की, ही माहिती आम्ही तुम्हाला देऊ शकत नाही. मतदार यादीचे विश्लेषण आम्हाला दिलं पाहिजे. अचानक वाढलेले मतदार होते कुठले आणि कसे आले याची माहिती आम्ही मागवली आहे. आम्हाला लेखी स्वरुपात स्ष्टपणे माहिती दिली पाहिजे”, अशी मागणी रोहित पवार यांनी केली.

“डिजीटल मतदार याद्या देण्यात याव्यात. बीएलोच्या डायरी नोंदी कशा झाल्या याची माहिती मिळायला हवी. तसेच येणाऱ्या निवडणुकीत ते कसे होणार आहे, याचीदेखील माहिती आम्हाला हवी आहे. मतदानाच्या दिवसाचे सीसीटीव्ही हवे आहेत. शेवटच्या तासात 68 लाख लोकांनी मतदान केलं. मग ते कोण होते ते आम्हाला बघायचं आहे”, असं रोहित पवार म्हणाले.

“लोकसभा आणि विधानसभा निवडणूक या काळात सर्वात जास्त मतदान हे पनवेलमध्ये वाढलं आहे. इथे 65000 मतदार वाढले आहेत. कल्याण ग्रामीणमध्ये 57000 मतदार वाढले. भोसरीत 56000, मीरा भाईंदर 53000, नालासोपारा 50000, चिंचवड 45000, हडपसर 43000 अशा संख्येत सहा महिन्यांत मतदार वाढले आहेत”, असा दावा रोहित पवार यांनी पत्रकार परिषदेत केला.