पहिल्याच पावसात मुंबई-गोवा महामार्गावरील रस्ता खचला; आवाशी येथे मालवाहू ट्रक पलटी
खेड : मुंबई-गोवा महामार्गाच्या चौपदरीकरणाच्या कामाबाबत पुन्हा एकदा प्रश्नचिन्ह उपस्थित झाले आहे. मान्सूनच्या पहिल्याच जोरदार पावसात खेड तालुक्यातील आवाशी परिसरात महामार्गाचा एक भाग खचल्याने मालवाहू ट्रक पलटी झाल्याची घटना घडली.
मिळालेल्या माहितीनुसार, खेडहून चिपळूणच्या दिशेने मालवाहतूक करणारा ट्रक आवाशी येथून जात असताना अचानक रस्त्याचा भाग खचला. त्यामुळे ट्रकचा तोल जाऊन वाहन एका बाजूला पलटी झाले. या अपघातात कोणतीही जीवितहानी झाली नसली तरी ट्रकचे मोठे नुकसान झाले आहे.
आवाशी परिसरात महामार्गाचे काम अद्याप सुरू असून अनेक ठिकाणी रस्त्याचे काम अपूर्ण आहे. पावसाळ्यापूर्वी काम पूर्ण न झाल्याने वाहनचालकांकडून सुरक्षेबाबत चिंता व्यक्त केली जात होती. त्यातच पहिल्याच मुसळधार पावसात रस्ता खचल्याने महामार्गाच्या कामाच्या गुणवत्तेबाबत प्रश्न उपस्थित होत आहेत.
घटनेनंतर काही काळ वाहतुकीवर परिणाम झाला. स्थानिक नागरिकांनी आणि वाहनचालकांनी महामार्गावरील अपूर्ण कामे तातडीने पूर्ण करून सुरक्षिततेच्या दृष्टीने आवश्यक उपाययोजना करण्याची मागणी केली आहे.
सुदैवाने अपघाताच्या वेळी परिसरात अन्य वाहने नसल्याने मोठी दुर्घटना टळली. मात्र या घटनेमुळे मुंबई-गोवा महामार्गाच्या कामाच्या दर्जाबाबत पुन्हा एकदा चर्चा सुरू झाली आहे.
