नागपूर-गोवा एक्सप्रेस आता कायमस्वरूपी! २४ डब्यांची एक्सप्रेस आणि प्रमुख शहरांचे थांबे

नागपूर-मडगाव दरम्यान धावणाऱ्या टूरिस्ट स्पेशल गाडीचे नियमितीकरण करून तिला ११२०३/११२०४ नागपूर-मडगाव एक्सप्रेस म्हणून सुरू करण्याचा महत्त्वपूर्ण निर्णय रेल्वे बोर्डाने घेतला असून प्रवाशांना मोठा दिलासा मिळणार आहे.

नियमित एक्सप्रेसचा दर्जा; प्रवाशांना दिलासा

नागपूर ते मडगाव दरम्यान चालणाऱ्या ०११३९/०११४० या विशेष गाडीचे नियमित एक्सप्रेसमध्ये रूपांतर करण्यात आले आहे. आता ही गाडी ११२०३/११२०४ नागपूर-मडगाव एक्सप्रेस या क्रमांकाने धावणार आहे. यामुळे कोकण व विदर्भाला जोडणारी महत्त्वाची रेल्वे सेवा अधिक स्थिर आणि नियोजित स्वरूपात उपलब्ध होणार आहे. विशेष गाडीच्या अनियमिततेमुळे त्रस्त असलेल्या प्रवाशांना याचा मोठा फायदा होईल.

वेळापत्रक व धावण्याचे दिवस

नागपूरहून ही एक्सप्रेस बुधवारी आणि शनिवारी दुपारी ३:५ वाजता सुटेल, तर मडगावहून गुरुवारी आणि रविवारी सायंकाळी ८:०० वाजता प्रस्थान करेल. परतीच्या प्रवासात नागपूरला सोमवारी आणि शुक्रवारी रात्री ९:३० वाजता आगमन होईल. रोहा येथे दोन्ही दिशांना थांबा देण्यात आला असून वेळापत्रकानुसार ६:४५/६:५० (नागपूरकडून) आणि ५:१५/५:२० (मडगावकडून) असा थांबा असेल.

महत्त्वाची स्थानके आणि सुविधा

या गाडीला वर्धा, पुलगाव, धामणगाव, बडनेरा, अकोला, शेगाव, मलकापूर, भुसावळ, नाशिक रोड, इगतपुरी, कल्याण, पनवेल, रोहा, माणगाव, खेड, चिपळूण, संगमेश्वर रोड, रत्नागिरी, राजापूर रोड, कणकवली, कुडाळ, सावंतवाडी रोड, थिवीम आणि करमाळी या स्थानकांवर थांबे देण्यात आले आहेत. भुसावळ आणि पनवेल येथे पाणी भरण्याची सुविधा राहील. या गाडीची रचना २४ डब्यांची असून त्यात जनरल, स्लीपर आणि वातानुकूलित कोचचा समावेश आहे.

तातडीने अंमलबजावणीचे निर्देश

रेल्वे बोर्डाने या निर्णयाची अंमलबजावणी लवकरात लवकर करण्याचे आदेश दिले आहेत. आवश्यक असल्यास उद्घाटनासाठी विशेष फेरी चालवून त्यानंतर नियमित वेळापत्रकात समाविष्ट करण्याचे निर्देशही देण्यात आले आहेत. विदर्भ-कोकण दरम्यानचा प्रवास अधिक सोयीस्कर करण्याच्या दृष्टीने हा निर्णय महत्त्वाचा मानला जात आहे.