भुसावळहून कोकण, गोवा जाण्यासाठी सोयीच्या ‘या’ एक्स्प्रेसला पुन्हा मुदतवाढ..!

जळगाव : सणासुदीचा हंगाम, लग्नसराई तसेच उन्हाळी सुट्ट्यांमुळे रेल्वे प्रवाशांची संख्या मोठ्या प्रमाणावर वाढत असल्याची नोंद घेऊन मध्य रेल्वे प्रशासनाने महत्त्वाच्या लांब पल्ल्याच्या विशेष गाड्यांच्या सेवांना मुदतवाढ देण्याचा महत्त्वपूर्ण निर्णय जाहीर केला आहे. एक मार्चपासून हा निर्णय अंमलात आला असून ,पुढील सूचना मिळेपर्यंत या गाड्या पूर्वनियोजित वारंवारतेनुसार धावणार आहेत.

मध्य रेल्वे प्रशासनाने दिलेल्या माहितीनुसार, गेल्या काही महिन्यांपासून विदर्भ, कोकण-गोवा तसेच उत्तर प्रदेश या दिशांकडे धावणाऱ्या लांब पल्ल्याच्या गाड्यांना अपेक्षेपेक्षा जास्त प्रतिसाद मिळत आहे. विशेषतः मुंबई महानगर क्षेत्रातून नागपूर, मडगाव, गोरखपूर आणि बलिया या भागांकडे जाणाऱ्या प्रवाशांची संख्या सातत्याने वाढत असल्याचे निरीक्षण नोंदवण्यात आले आहे. कोकण तसेच गोवा मार्गावर पर्यटन हंगाम, समुद्र किनाऱ्यावरील पर्यटन स्थळांची लोकप्रियता तसेच सणासुदीच्या काळात वाढणारी गर्दी यामुळे मडगांवकडे जाणाऱ्या गाड्यांमध्ये आसनांची मागणी मोठ्या प्रमाणावर वाढली आहे. आठवड्याच्या शेवटी आणि सुट्ट्यांच्या काळात या मार्गावरील गाड्या पूर्ण क्षमतेने भरून धावत असल्याचे रेल्वे प्रशासनाने स्पष्ट केले आहे. आरक्षणाच्या आकडेवारीचा आढावा घेतल्यानंतर विशेष गाड्यांच्या फेऱ्या बंद केल्यास प्रवाशांची गैरसोय होण्याची शक्यता होती. नियमित गाड्यांवरील ताण कमी करण्यासाठी आणि प्रवाशांना पर्यायी सुविधा उपलब्ध करून देण्यासाठी या विशेष गाड्यांची मुदतवाढ देण्याचा निर्णय घेण्यात आला आहे.

नागपूर-मडगाव विशेष गाडी

विदर्भ, कोकण आणि गोवा दरम्यान प्रवास करणाऱ्या प्रवाशांसाठी सुरू करण्यात आलेल्या ०११३९ नागपूर-मडगाव विशेष या गाडीची सेवा दर बुधवारी आणि शनिवारी कायम ठेवण्यात आली आहे. तर परतीच्या दिशेने धावणारी ०११४० मडगाव-नागपूर विशेष ही गाडी दर गुरुवारी आणि रविवारी प्रवाशांच्या सेवेत राहणार आहे. गोवा पर्यटनासाठी जाणाऱ्या प्रवाशांबरोबरच कामानिमित्त व शिक्षणासाठी प्रवास करणाऱ्या नागरिकांसाठी ही सेवा अत्यंत उपयुक्त ठरत आहे. या गाडीला दोन्ही बाजुने वर्धा, पुलगाव, धामणगाव, बडनेरा, अकोला, शेगाव, मलकापूर, भुसावळ, नाशिकरोड, इगतपुरी, कल्याण, पनवेल, रोहा, मानगाव, खेड, चिपळून, संगमेश्वर रोड, रत्नागिरी, राजापूर रोड, कवकवली, कुडाळ, सावंतवाडी या स्थानकांवर थांबा देण्यात आला आहे.

दादर-गोरखपूर विशेष गाडी

मुंबई आणि उत्तर प्रदेश दरम्यान मोठ्या प्रमाणावर स्थलांतरित कामगार, विद्यार्थी तसेच नियमित प्रवाशांचा प्रवास होत असल्याने या मार्गावरील गाड्यांना मोठी मागणी आहे. त्यानुसार, ०१०२७ दादर-गोरखपूर विशेष ही गाडी दर मंगळवारी, गुरुवारी, शनिवारी आणि रविवारी धावणार आहे. तसेच ०१०२८ गोरखपूर-दादर विशेष ही गाडी दर सोमवारी, मंगळवारी, गुरुवारी आणि शनिवारी चालविण्यात येईल.

दादर-बलिया विशेष गाडी

मुंबई आणि पूर्व उत्तर प्रदेशातील बलिया स्थानकांदरम्यानची वाढती प्रवासी संख्या लक्षात घेता ०१०२५ दादर-बलिया विशेष ही गाडी दर सोमवारी, बुधवारी आणि शुक्रवारी धावेल. तर ०१०२६ बलिया-दादर विशेष ही गाडी दर बुधवारी, शुक्रवारी आणि रविवारी प्रवाशांच्या सेवेत उपलब्ध राहील. सर्व विशेष गाड्यांच्या वेळा पत्रकात, मार्गातील थांब्यांमध्ये किंवा डब्यांच्या संरचनेत कोणताही बदल करण्यात आलेला नाही. त्यामुळे पूर्वीप्रमाणेच प्रवासी आपले नियोजन करू शकतात. सर्व गाड्यांचे आरक्षण नियमित पद्धतीने उपलब्ध राहील. प्रवाशांनी तिकीट आरक्षण करताना अधिकृत संकेतस्थळ किंवा अधिकृत आरक्षण केंद्रांचा वापर करावा, असे आवाहन रेल्वे प्रशासनाने केले आहे.