वालोटी ग्रामपंचायतीच्या नूतन इमारतीच्या स्वप्नपूर्तीकडे मोठे पाऊल
आमदार शेखरजी निकम यांच्या प्रयत्नांना यश
बाळासाहेब ठाकरे स्मृती मातोश्री योजनेतून निधी मंजूर
ग्रामीण भागातील वालोटी ग्रामपंचायतीची सुसज्ज नवीन इमारत व्हावी, ही ग्रामस्थांची अनेक वर्षांची मागणी अखेर पूर्णत्वास जात आहे. चिपळूण–संगमेश्वर विधानसभा मतदारसंघाचे लोकप्रिय आमदार शेखरजी निकम यांनी ग्रामस्थांच्या पाठपुराव्याची दखल घेत बाळासाहेब ठाकरे स्मृती मातोश्री योजनेअंतर्गत निर्मल व तंटामुक्त वालोटी ग्रामपंचायतीसाठी निधी मंजूर केला असून, या नूतन इमारतीचे भूमिपूजन आमदार निकम यांच्या प्रमुख उपस्थितीत पार पडले.
वालोटी हे ग्रामीण भागातील महत्त्वाचे आणि विकासाच्या दृष्टीने केंद्रस्थानी असलेले गाव असल्याचे आमदार महोदयांनी आपल्या भाषणात नमूद केले. नवी इमारत उभारल्यानंतर ग्रामकारभार अधिक सक्षम, सुव्यवस्थित आणि पारदर्शक होणार असल्याचा विश्वास त्यांनी व्यक्त केला. तसेच ग्रामस्थांसाठी विविध सुविधा उभ्या राहतील आणि सर्वसामान्यांच्या अडचणी सोडवणे अधिक सुलभ होईल, असेही त्यांनी सांगितले.
राजकारणात सक्रिय झाल्यापासून वालोटी ग्रामस्थांनी दिलेला सातत्यपूर्ण पाठिंबा मी कधीही विसरणार नाही, अशा शब्दांत आमदार निकम यांनी गावकऱ्यांचे आभार मानले. महिलांच्या बचत गटांच्या कामाला या इमारतीमुळे बळ मिळेल आणि भविष्यात वालोटी ही तालुक्यातील एक उत्तम, सुसज्ज ग्रामपंचायत म्हणून ओळख निर्माण करेल, असा विश्वासही त्यांनी व्यक्त केला.
या भूमिपूजन सोहळ्यास तालुकाध्यक्ष नितीन ठसाळे, मनोहर पिनगे, अरुण आंबेडे, दिनेश दळवी, सरपंच अवंतीका आंबेडे, उपसरपंच सचिन बामणे, रवीना सुतार, प्रमोद कदम, दीक्षा सकपाळ, सुभाष बनकर, देविका पोसनाक, संजय कांगणे, ग्रामपंचायत अधिकारी सुप्रिया पालवे, शरद सकपाळ, निलेश पोसनाक, अजय गोटल, सुनील कदम आदी मान्यवर उपस्थित होते.
