राजापूरच्या पाणीप्रश्नासाठी कोदवली धरणाचे दरवाजे बसविण्याचे काम सुरू

राजापूर : राजापूर शहरातील संभाव्य पाणीटंचाईचा प्रश्न लक्षात घेऊन शहराचा पाणीपुरवठा सुरळीत राहावा, यासाठी आमदार किरण (भैय्या) सामंत यांच्या सूचनेनुसार कोदवली येथील साहेबांचे धरण येथे दरवाजे बसविण्याचे काम सुरू करण्यात आले आहे. भविष्यात पाण्याचा तुटवडा निर्माण होण्याची शक्यता लक्षात घेऊन धरणातील पाणीसाठा अडविण्यासाठी तातडीने उपाययोजना करण्याच्या सूचना आमदार सामंत यांनी संबंधित ठेकेदाराला दिल्या होत्या.
राजापूर शहरासाठी पाणीप्रश्न हा अत्यंत जिव्हाळ्याचा विषय असून, आगामी काळात नागरिकांना पाणीटंचाईचा सामना करावा लागू नये, यासाठी आमदार सामंत यांनी या कामाकडे विशेष लक्ष केंद्रित केले आहे. धरणाचे दरवाजे बसविण्याचे काम तातडीने सुरू करून पाणीसाठा टिकवून ठेवण्याच्या दृष्टीने आवश्यक कार्यवाही करण्याचे निर्देश त्यांनी दिले आहेत.
शिवसेनेच्या नगरसेवकांकडून कामाची पाहणी
कोदवली येथील साहेबांच्या धरणावर सुरू असलेल्या कामाची शिवसेनेचे नगरसेवक तथा गटनेते राहुल तांबे, दिलीप अमरे, दिलीप चव्हाण, सुभाष बाकाळकर आणि महेश रहाटे यांनी प्रत्यक्ष घटनास्थळी जाऊन पाहणी केली. यावेळी त्यांनी सुरू असलेल्या कामाची माहिती घेऊन त्याचा आढावा घेतला.
राजापूर शहराला भविष्यात संभाव्य पाणीटंचाईचा सामना करावा लागू नये आणि नागरिकांना नियमित पाणीपुरवठा व्हावा, यासाठी धरणातील पाणीसाठ्याचे योग्य नियोजन करणे आवश्यक आहे. या दृष्टीने धरणाचे दरवाजे बसविण्याचे काम वेळेत आणि प्रभावीपणे पूर्ण होणे गरजेचे असल्याचे यावेळी अधोरेखित करण्यात आले.
पाणीप्रश्न सोडविण्यासाठी विशेष लक्ष
भविष्यातील पाणीटंचाईची शक्यता लक्षात घेऊन राजापूर शहरातील पाणीपुरवठ्याच्या प्रश्नाकडे गांभीर्याने लक्ष द्यावे, अशा स्पष्ट सूचना आमदार किरण सामंत यांनी शिवसेनेच्या नगरसेवकांना दिल्या आहेत. त्यानुसार शहरातील पाणीपुरवठ्याशी संबंधित कामांचा आढावा घेणे आणि आवश्यक उपाययोजनांच्या अंमलबजावणीसाठी पाठपुरावा करण्यावर भर देण्यात येत आहे.
राजापूर शहराचा पाणीप्रश्न मार्गी लावण्यासाठी धरणावरील कामाला गती देण्यात आली असून, या कामामुळे उपलब्ध पाणीसाठ्याचे योग्य व्यवस्थापन करण्यास मदत होईल, अशी अपेक्षा व्यक्त केली जात आहे.