दापोलीत डोंगराला दोन किलोमीटरपर्यंत भेगा; नागरिकांचे स्थलांतर सुरू
दापोली : तालुक्यातील मळे-सुतारवाडी येथे मुसळधार पावसामुळे डोंगराला मोठ्या प्रमाणात भेगा पडून भूस्खलनाचा गंभीर धोका निर्माण झाला आहे. डोंगराला दोन किलोमीटरपर्यंत, तसेच दोन ते चार फूट खोल भेगा पडल्याचे प्राथमिक पाहणीत निदर्शनास आले आहे. भूस्खलनाच्या धोक्यामुळे सुतारवाडीतील ग्रामस्थांचे स्थलांतर करण्यास सुरुवात करण्यात आली आहे.
या प्रकारची माहिती दाभोळ पोलीस स्थानकाचे पोलीस निरीक्षक गोरे, तसेच नायब तहसीलदार देशमुख यांनी कर्मचाऱ्यांसह घटनास्थळी जाऊन पाहणी केली. महसूल विभागाने घटनास्थळाचा पंचनामा करून संपूर्ण घटनेचा अहवाल वरिष्ठ कार्यालयाकडे पाठवला असून, पुढील कार्यवाही सुरू केली आहे.
संभाव्य भूस्खलनाचा धोका लक्षात घेऊन महसूल प्रशासनाने सुतारवाडीतील ग्रामस्थांचे तातडीने सुरक्षितस्थळी स्थलांतर करण्याच्या सूचना दिल्या आहेत. ग्रामस्थांनी कोणतीही जोखीम न पत्करता प्रशासनाच्या सूचनांचे पालन करावे, असे आवाहन करण्यात आले आहे. याठिकाणी भूवैज्ञानिक तज्ज्ञांच्या पथकाला पाचारण करण्यात आले आहे. डोंगराच्या स्थैर्याची आणि भेगांच्या स्वरूपाची तपासणी केली जाणार आहे. या अहवालानंतर पुढील उपाययोजना निश्चित केल्या जाणार आहेत.
मुसळधार पावसाच्या पार्श्वभूमीवर प्रशासनाने ग्रामस्थांना सतर्क राहण्याची सूचना केली आहे, तसेच धोकादायक ठिकाणांपासून दूर राहण्याचे आणि केवळ अधिकृत सूचनांवरच विश्वास ठेवण्याचे आवाहन केले आहे.
डोंगराच्या पायथ्याशी राहणाऱ्या कुटुंबांमध्ये भीतीचे वातावरण पसरले आहे. प्रत्येक पावसाच्या सरीसोबत डोंगर खचेल की काय, या धास्तीने ग्रामस्थ रात्र जागून काढत आहेत. काही कुटुंबांनी सुरक्षिततेच्या दृष्टीने घरांचा तात्पुरता निरोप घेतला आहे.
