मासेमारीच्या पहिल्या खेपेत जाळ्यात पापलेटचं घबाड!
दापोली : हर्णे बंदरातील मच्छीमारांच्या पहिल्याच खेपेत जाळ्यात पापलेटचं घबाड मिळाले आहे. मच्छीमारांसाठी ही दिलासादायक बाब आहे. दरम्यान, पापलेटची आवक अशीच कायम राहण्याची अपेक्षा येथील मच्छीमार व्यक्त करत आहेत.
देशाच्या पश्चिम किनारपट्टीवर मासेमारी हंगामाला सुरुवात झाली आहे. समुद्री वातावरण शांत असल्याने यंदा हर्णे बंदरातील मच्छीमारांनी 1 ऑगस्टचा शुभारंभाचा मुहूर्त साधला आहे. बहुतांश नौकानी हर्णे बंदरातून मासेमारीला सुरुवात केली आहे. त्यापैकी काही नौका किनार्‍यावर मासळी घेऊन आल्या असून या मच्छीमारांनी पापलेटची पहिली पलटी आणलेली होती. नवीन हंगामातील सुरुवातीकडे येथील सर्वच मच्छीमारांचे लक्ष लागून होते.
दरम्यान, पहिली पलटी पापलेटची असा रिपोर्ट समजल्याने मच्छीमारांच्या आशा पल्लवित झाल्या आहेत. त्यामुळे हर्णे बंदरातील यंदाच्या लिलावाची सुरुवात पापलेटच्या बोलीने झाली असून साधारण किलोला 1 हजारच्या पुढे दर मिळाल्याचे समजते. मात्र, मंगळवारपासून जादा नौका हर्णे बंदरात मासळी उतरविण्याची शक्यता असल्याने भाव उतरण्याची शक्यता व्यक्त होत असली तरी हर्णे बंदरातील उलाढाल मात्र मोठ्या प्रमाणात वाढलेली दिसणार आहे. दरम्यान, मागील मोसमात वादळी पावसामुळे मासेमारीला 15 मे 2025 रोजी ब्रेक लागला होता.त्यामुळे मच्छीमारांचे मोठे नुकसान झाले होते.त्यामुळे नवीन हंगामाचे सुरुवातीकडे सर्वांचे लक्ष लागून होते. सध्या तरी पापलेटच्या आवकेने मच्छीमारांच्या आशा पल्लवित झालेल्या दिसत आहेत. त्यातच आता काही ठिकाणी म्हाकुळ मासळी मिळत असल्याचे समजत असून यामुळे यंदाची दमाणी तेजीत येण्याची चिन्हे आहेत.
