चिपळूण शहरातील बुरूमतळी येथे रिक्षाच्या स्टेअरिंगवर कुत्र्याने उडी घेतल्याने रिक्षा झाली पलटी.

चिपळूण शहरातील बुरूमतळी येथील मुख्य रस्त्यावर सोमवारी एक विचित्र अपघात घडला. रस्त्यावर फिरत असलेल्या एका कुत्र्याने थेट रिक्षा चालकाने पकडलेल्या स्टिअरिंगवरच उडी घेतल्याने रिक्षा पलटी झाली. रिक्षेचा वेग कमी असल्याने आणि समोरून कोणते वाहन न आल्याने सुदैवाने मोठा अनर्थ टळला. या रिक्षात एक वयस्कर महिला होत्या. या प्रकारामुळे त्या घाबरल्याने त्यांना एका खाजगी रूग्णालयात उपचारासाठी नेण्यात आले. दरम्यान या प्रकारामुळे शहरात भटक्या कुत्र्यांचा विषय पुन्हा ऐरणीवर आला आहे.टेरव येथील परेश काणेकर हे आपल्या ताब्यातील रिक्षा घेवून चिपळूणच्या दिशेने निघाले होते. या रिक्षामध्ये वयोवृद्ध महिला बसल्या होत्या. चिपळुणातील पाग पॉवर हाऊस ते चिंचनाका या रस्त्यावरून जात असताना बुरूमतळी येथील डॉ. बाबासाहेब आंबेडकर वाचनालयासमोर अचानक एका कुत्र्याने थेट रिक्षात उडी घेतली. तो कुत्रा स्टेअरिंगवरच आदळल्याने आणि अचानक हा प्रसंग घडल्याने परेश काणेकर गोंधळून गेले. त्यांनी रिक्षा सावरण्याचा प्रयत्न केला. मात्र त्यांच्या हातातील स्टेअरिंग फिरले आणि रिक्षा पलटी होवून अपघात झाला.www.konkantoday.com