संजीवन प्रतिष्ठानच्या ‘गड-किल्ल्यांचा जागर २०२६’ स्पर्धेचा दिमाखदार बक्षीस वितरण सोहळा संपन्न!

हरचिरी : छत्रपती शिवाजी महाराजांचा दैदीप्यमान इतिहास, स्वराज्याची गौरवगाथा आणि महाराष्ट्रातील ऐतिहासिक गड-किल्ल्यांचे महत्त्व नव्या पिढीपर्यंत पोहोचावे, या उदात्त हेतूने संजीवन प्रतिष्ठान, चांदेराई यांच्या वतीने आयोजित करण्यात आलेल्या सलग आठव्या वर्षातील ‘गड-किल्ल्यांचा जागर २०२६’ या भव्य दिवाळी गड-किल्ले निर्मिती स्पर्धेचा बक्षीस वितरण सोहळा मंगळवार, दिनांक १० नोव्हेंबर २०२६ रोजी उत्साहपूर्ण वातावरणात संपन्न झाला.

या कार्यक्रमाला रत्नागिरी ग्रामीण पोलीस ठाण्याचे पोलीस उपनिरीक्षक श्री. अभय तेली प्रमुख पाहुणे म्हणून उपस्थित होते. त्यांच्यासमवेत पोलीस हवालदार श्री. सनगरे यांचीही उपस्थिती लाभली.

या स्पर्धेचे परीक्षण देवरुख येथील श्री. होडे सर, पावस हायस्कूलचे श्री. भेळेकर सर आणि हरचिरी-उमरे हायस्कूलचे मुख्याध्यापक श्री. योगेश गजानन शेट्ये सर यांनी केले. तिन्ही परीक्षकांनी स्पर्धकांनी साकारलेल्या गड-किल्ल्यांच्या प्रतिकृतींचे बारकाईने परीक्षण करून त्यांच्या कल्पकतेला आणि कलात्मकतेला योग्य न्याय दिला.

स्पर्धेचा निकाल पुढीलप्रमाणे :

मोठा गट – विजेते

१. प्रथम क्रमांक : गडकोट मावळे प्रतिष्ठान, कोंडवी
प्रतिकृती – पन्हाळगड – विशाळगड – पावनखिंड.

२. द्वितीय क्रमांक : शिवभक्त ग्रुप, टिके कांबळेवाडी
प्रतिकृती – किल्ले रायगड.

३. तृतीय क्रमांक : जय हो ग्रुप, झरेवाडी
प्रतिकृती – किल्ले रायगड.

उत्तेजनार्थ पारितोषिके :

१. जय हनुमान हौशी कलाकार, झरेवाडी
प्रतिकृती – पन्हाळा – पावनखिंड – विशाळगड.

२. युवा ग्रुप, टीके, कांबळेवाडी
प्रतिकृती – राजगड.

लहान गट – विजेते

१. प्रथम क्रमांक : अर्णव निंबरे व सहकारी, कोंडवी
किल्ला – शिवनेरी.

२. द्वितीय क्रमांक : शिवप्रेमी ग्रुप सहारा, टिके कांबळेवाडी
प्रतिकृती – पन्हाळा – विशाळगड – पावनखिंड.

३. तृतीय क्रमांक : जय काळकेश्वर ग्रुप
किल्ला – लोहगड.

उत्तेजनार्थ पारितोषिके :

१. वेदांत रवींद्र पावसकर, कोंडवी
किल्ला – जंजिरा.

२. दुर्वा विनोद तळेकर व ग्रुप, हरचिरी
किल्ला – प्रतापगड.

मान्यवरांची उपस्थिती

या बक्षीस वितरण सोहळ्याला संजीवन प्रतिष्ठानचे संस्थापक अध्यक्ष श्री. संयोग ऊर्फ दादा दळी, सचिव श्री. महेश गांगण, हरचिरी-उमरे हायस्कूलचे मुख्याध्यापक श्री. योगेश गजानन शेट्ये, हरचिरी केंद्राचे केंद्रप्रमुख श्री. समीर कारेकर, श्री. पंकज दळी, श्री. ईश्वर दळी, श्री. प्रसाद बेर्डे, श्री. दर्शन दळी, ॲड. ओंकार दळी, श्री. स्वरूप गांगण, श्री. निखिल दळी, श्री. अष्टम दळी, श्री. गौरव शिंदे, श्री. विनायक शिंदे, श्री. रुपेश शिंदे, श्री. अमर शिंदे, विशेष कार्यकारी अधिकारी श्री. दत्ताराम निंबरे यांच्यासह इतर मान्यवर, ग्रामस्थ आणि सर्व स्पर्धक किल्लेदार मोठ्या संख्येने उपस्थित होते.

इतिहासाची ओळख आणि बालकलागुणांना व्यासपीठ!

या स्पर्धेमध्ये ६ ते १५ वयोगटातील मुलांसाठी ‘छोटे किल्लेदार’ हा स्वतंत्र गट, तर सर्वांसाठी खुला असलेला ‘गडकोट मावळे’ हा खुला गट अशा दोन गटांत स्पर्धा आयोजित करण्यात आली होती. विशेष म्हणजे प्रत्येक स्पर्धकाने आपल्या घरीच गड-किल्ल्यांची प्रतिकृती साकारून या स्पर्धेत सहभाग घेतला होता.

स्पर्धकांनी पन्हाळगड, विशाळगड, रायगड, राजगड, शिवनेरी, लोहगड, जंजिरा, प्रतापगड आदी ऐतिहासिक गड-किल्ल्यांच्या प्रतिकृती अत्यंत कल्पकतेने आणि कलात्मकतेने साकारल्या होत्या. विशेषतः पन्हाळगड ते विशाळगड आणि ऐतिहासिक पावनखिंडीचा शौर्यगाथेशी जोडलेला देखावा स्पर्धकांच्या ऐतिहासिक जाणिवेची साक्ष देणारा ठरला.

आजच्या मोबाईल आणि डिजिटल युगात मुलांना इतिहासाशी जोडणारा, त्यांच्यामध्ये ऐतिहासिक वारशाबद्दल अभिमान निर्माण करणारा आणि प्रत्यक्ष कृतीतून शिकण्याची संधी देणारा संजीवन प्रतिष्ठानचा हा उपक्रम निश्चितच प्रेरणादायी व कौतुकास्पद ठरला. या उपक्रमामुळे मुलांच्या सुप्त कलागुणांना, सर्जनशीलतेला आणि कल्पकतेला हक्काचे व्यासपीठ उपलब्ध झाले.

संजीवन प्रतिष्ठानचे संस्थापक अध्यक्ष श्री. संयोग ऊर्फ दादा दळी यांच्या संकल्पनेतून आणि पुढाकारातून गेली आठ वर्षे हा उपक्रम सातत्याने राबविण्यात येत आहे. दिवाळीच्या आनंदाला ऐतिहासिक आणि सांस्कृतिक वारशाची जोड देत शिवकालीन इतिहासाचा जागर घराघरांत पोहोचविण्याचा प्रतिष्ठानचा हा प्रयत्न परिसरातील नागरिकांच्या कौतुकाचा विषय ठरला आहे.

‘गड-किल्ले हा महाराष्ट्राचा अभिमान, शिवरायांचा इतिहास ही आपली शान!’ या प्रेरणादायी संदेशातून संजीवन प्रतिष्ठानने नव्या पिढीमध्ये इतिहासप्रेम, स्वराज्यनिष्ठा आणि महाराष्ट्राच्या ऐतिहासिक वारशाबद्दल अभिमान निर्माण करण्याचे महत्त्वपूर्ण कार्य केले आहे.