कमी पटसंख्येच्या शाळा बंद होणार नाहीत; शिक्षणाधिकाऱ्यांचे स्पष्टीकरण
रत्नागिरी, दि. १२ ) : रत्नागिरी जिल्हा परिषदेच्या कमी पटसंख्या असलेल्या प्राथमिक शाळांचे विलिनीकरण किंवा समायोजन केले जाणार असल्याच्या चर्चा सध्या सोशल मीडिया आणि काही वृत्तमाध्यमांवर सुरू आहेत. मात्र, या बातम्या पूर्णपणे निराधार व वस्तुस्थितीशी विसंगत असल्याचे स्पष्टीकरण जिल्हा परिषदेच्या प्राथमिक शिक्षणाधिकारी मनिषा जगदाळे यांनी दिले आहे. पालक, शिक्षक आणि नागरिकांनी अशा अप्रमाणित अफवांवर विश्वास ठेवू नये, असे आवाहनही त्यांनी केले आहे.
खुलाशातील प्रमुख मुद्दे:
- शासनाचा कोणताही आदेश नाही: कमी पटसंख्येच्या शाळा बंद करण्याबाबत किंवा त्यांचे समायोजन करण्याबाबत राज्य शासनामार्फत अद्याप कोणताही शासन निर्णय (GR) निर्गमित करण्यात आलेला नाही.
- कोणतीही कार्यवाही सुरू नाही: रत्नागिरी जिल्हा परिषद शिक्षण विभागामार्फत जिल्ह्यातील कोणत्याही प्राथमिक शाळेचे विलिनीकरण करणे, शाळा बंद करणे अथवा अशा शाळांची यादी तयार करण्याची कोणतीही प्राथमिक कार्यवाही सुरू केलेली नाही.
- अधिकृत माहितीवरच विश्वास ठेवा: विद्यार्थी व शैक्षणिक हिताशी संबंधित कोणताही निर्णय हा केवळ शासनाच्या अधिकृत आदेशानुसारच घेतला जातो. त्यामुळे नागरिकांनी केवळ शासन आणि जिल्हा परिषद प्रशासनाच्या अधिकृत माध्यमांतून येणारी माहितीच ग्राह्य धरावी.
“शैक्षणिक क्षेत्रासारख्या संवेदनशील विषयांवर वृत्त प्रसिद्ध करण्यापूर्वी प्रसारमाध्यमांनी संबंधित विभागाकडून वस्तुस्थितीची खातरजमा करून घ्यावी, जेणेकरून पालक व विद्यार्थ्यांमध्ये संभ्रम निर्माण होणार नाही.” — मनिषा जगदाळे, शिक्षणाधिकारी (प्राथमिक), जिल्हा परिषद, रत्नागिरी
