राजवीर पोवारची राज्यस्तरीय कुस्ती स्पर्धेसाठी निवड
हरचिरीच्या महात्मा गांधी दुय्यम शिक्षण मंदिराची मान उंचावली
रत्नागिरी:
सातारा येथे पार पडलेल्या विभागस्तरीय शालेय कुस्ती स्पर्धेत रत्नागिरीतील क्रीडा क्षेत्राच्या मुकुटात आणखी एक मानाचा तुरा रोवला गेला आहे. तालुका व जिल्हा पातळीवर आपल्या कौशल्याची चुणूक दाखवल्यानंतर, हरचिरी उमरे, ता.जि. रत्नागिरी येथील महात्मा गांधी दुय्यम शिक्षण मंदिरातील १४ वर्षांखालील ३८ किलो वजनी गटात खेळाडू कुमार राजवीर सतीश पोवार याने उत्कृष्ट कामगिरी करत थेट राज्यस्तरीय कुस्ती स्पर्धेसाठी आपली जागा निश्चित केली आहे.
विभागस्तरीय स्पर्धेत राज्यभरातील अनेक गुणवंत आणि तगड्या मल्लांचे आव्हान राजवीरसमोर होते. मात्र, अत्यंत चुरशीच्या झालेल्या सामन्यांमध्ये राजवीरने आपल्या चपळाईच्या, डावपेचांच्या आणि पकडीच्या जोरावर प्रतिस्पर्ध्यांना धूळ चारली. प्रत्येक कुस्तीत त्याने दाखवलेला संयम आणि प्रतिस्पर्ध्याची चाल ओळखून लावलेले डाव यामुळे त्याने प्रेक्षकांची व पंचांची दाद मिळवली. त्याच्या या घवघवीत यशामुळे आता त्याची निवड आगामी राज्यस्तरीय शालेय कुस्ती स्पर्धेसाठी झाली आहे.
राजवीरच्या या देदीप्यमान यशामागे त्याचे अथक परिश्रम, जिद्द आणि शाळेचे क्रीडा शिक्षक मारुती गलांडे सर यांचे मोलाचे मार्गदर्शन लाभले आहे. गलांडे सरांनी राजवीरमधील सुप्त गुण ओळखून त्याच्यावर घेतलेली मेहनत, सरावातील शिस्त आणि ऐनवेळी दिलेले रणनीतिक मार्गदर्शन यामुळेच हा विजय साकार होऊ शकला.
राजवीरने मिळवलेल्या या अभूतपूर्व यशामुळे महात्मा गांधी दुय्यम शिक्षण मंदिर, हरचिरी उमरे तसेच संपूर्ण परिसराची मान अभिमानाने उंचावली आहे. या यशाबद्दल संस्थेचे सर्व पदाधिकारी, शाळेचे मुख्याध्यापक, सर्व शिक्षक आणि शिक्षकेतर कर्मचारी वृंद यांच्या वतीने राजवीर पोवार आणि क्रीडा शिक्षक मारुती गलंडे सर यांचे विशेष अभिनंदन करण्यात आले.
