संगमेश्वर तालुक्यातील कडवईतील राडा प्रकरणी पती – पत्नीसह तिघांना अटक
संगमेश्वर तालुक्यातील कडवई बाजारपेठेत रविवारी सकाळी तलवारी व लोखंडी रॉडच्या सहाय्याने दहशत माजविणार्या टोळीला जेरबंद करण्यात संगमेश्वर पोलिसांना यश आले आहे. या प्रकरणात मुख्य आरोपी सुरेश दाजी इंजळे याच्यासह त्याची पत्नी स्नेहल इंजळे आणि साथीदार रोशन लक्ष्मण ओकटे या तिघांना अटक करण्यात आली असून न्यायालयाने त्यांना दोन दिवसांची पोलीस कोठडी सुनावली आहे.
रविवारी सकाळी सुमारे ९.३० सुमारास सुरेश इंजळे हा साथीदारांसह कडवई बाजारपेठेत दाखल झाला. फरिदा कमाल वागले यांच्या घरासमोर उभी असलेली आलिशान होंडा सिटी कार ही हर्षद मोडक यांचीच असल्याची खात्री करून घेतल्यानंतर संशयित आरोपींनी गाडीवर हल्ला चढवला.
तलवार आणि लोखंडी रॉडच्या सहाय्याने गाडीच्या काचा फोडून मोठे नुकसान करण्यात आले होते. यावेळी मध्यस्थी करण्याचा प्रयत्न करणार्या ६४ वर्षीय वृद्ध महिलेलाही धमकावण्यात आले, सुरुवातीला केवळ सुरेश इंजळे याचे नाव समोर आले होते; मात्र पोलीस हवालदार एस. एस. जाधव व त्यांच्या पथकाने केलेल्या सखोल चौकशीत स्नेहल इंजळे हिचाही सक्रिय सहभाग असल्याचे उघड झाले.www.konkantoday.com
