गुहागर आगारासाठी नवीन बसेस आणि वाहक, चालक, कर्मचारी उपलब्ध करून द्या

गुहागर आगारामध्ये बसेस आणि कर्मचारी कमतरतेमुळेच बस फेऱ्या रद्द कराव्या लागत आहेत. त्यामुळे प्रवासी आणि शालेय, कॉलेजच्या विद्यार्थांचेही हाल होत‌ असून, बसफेरी अचानक रद्द होत असल्यामुळे विद्यार्थ्यांचे शैक्षणिक नुकसान होत आहे. याचा गांभीर्याने विचार करून गुहागर आगारासाठी कमीत कमी १५ नवीन बसेस आणि २० वाहक, चालक, कर्मचारी उपलब्ध करून द्यावे, अशी आग्रही मागणी कॉंग्रेसचे माजी गुहागर तालुका अध्यक्ष मिलिंद आत्माराम चाचे यांनी राज्याचे परिवहन मंत्री प्रताप सरनाईक यांच्याकडे निवेदनाद्वारे केली आहे.
“बसफेऱ्या रद्द होतात, तेव्हा गुहागर तालुक्यातील प्रवाशांना, विद्यार्थांना गुहागर आगारमधून बसेस आणि कर्मचारी कमतरतेचे कारण सांगितले जाते आणि ते कारण खरे आहे. राज्याचे परिवहन मंत्री या नात्याने माझ्या मागणीचा आपण सकारात्मक विचार करून गुहागर आगारासाठी त्वरित १५ नवीन बसेस आणि २० वाहक, चालक, कर्मचारी उपलब्ध करून द्यावे,” असे या निवेदनात नमूद करण्यात आले आहे.