
४००० कोटींपेक्षा जास्त कमाई करणार! ‘रामायण’ चित्रपटाबाबत अभिनेत्री लारा दत्ताचा मोठा दावा!
Ramayan : रणबीर कपूरची प्रमुख भूमिका असलेल्या ‘रामायण’ सिनेमाने बॉक्स ऑफिसवर जबरदस्त कमाई केली असून, आता तो जगभरातील सर्वाधिक कमाई करणाऱ्या टॉप ५ भारतीय चित्रपटांपैकी एक ठरला आहे. याच चित्रपटात राणी कैकेयीची भूमिका साकारणाऱ्या प्रसिद्ध अभिनेत्री लारा दत्ताने या सिनेमाच्या कमाईबाबत मोठा दावा केला आहे. तिच्या मते, हा चित्रपट आपल्या ४ हजार कोटी रुपयांच्या बजेटपेक्षाही अधिक गल्ला जमवेल.
एका मुलाखतीत लारा दत्ताने ‘रामायण’ला जगातील सर्वोत्कृष्ट चित्रपटांपैकी एक म्हटले आहे. ४ हजार कोटींच्या बजेटबाबत बोलताना ती म्हणाली की, ‘मला पूर्ण खात्री आहे की हा सिनेमा आपला खर्च वसूल करेल. केवळ बॉक्स ऑफिसच्या माध्यमातूनच नाही, तर निर्माते नमित मल्होत्रा यांनी आखलेल्या अनोख्या योजनांमुळे हा चित्रपट बजेटपेक्षा खूप जास्त कमाई करेल, असा मला विश्वास आहे.’
दोन भागांमध्ये तयार होत असलेल्या या सिनेमाचे एकूण बजेट ४ हजार कोटी रुपये आहे. रणबीर कपूर, यश आणि साई पल्लवी यांची प्रमुख भूमिका असलेला या चित्रपटाचा पहिला भाग ५ नोव्हेंबर रोजी प्रदर्शित झाला. १८ नोव्हेंबरपर्यंत या सिनेमाने जगभरात १५०० कोटी रुपयांचा टप्पा ओलांडला आहे. यामध्ये भारतातील ८३९ कोटी आणि परदेशातील सुमारे ७०० कोटी रुपयांच्या कमाईचा समावेश आहे.
दुसरीकडे, सॅकनिल्कच्या आकडेवारीनुसार दुसऱ्या आठवड्यात मंगळवारपासून या चित्रपटाच्या कमाईत घट झाली आहे. १२ व्या दिवशी ३२ कोटी आणि १३ व्या दिवशी २८ कोटी रुपये कमावणाऱ्या या सिनेमाने १४ व्या दिवशी (दुसऱ्या बुधवारी) देशांतर्गत बॉक्स ऑफिसवर १६ कोटींचा टप्पा ओलांडला. १४ व्या दिवशी कमाई वाढण्याची शक्यता असली तरी, आत्तापर्यंत या सिनेमाने केवळ ८३२ कोटी रुपयांची नेट कमाई आणि एकूण १००० कोटींची कमाई केल्याचेही या आकडेवारीत म्हटले आहे.




