चिपळुणातील सवतसडा धबधबा प्रवाहित, पर्यटकांचे आकर्षण वाढले
चिपळूण, दि. २८ : चार दिवसांच्या विश्रांतीनंतर कोकणात मान्सून पुन्हा सक्रिय झाला असून रत्नागिरी जिल्ह्यासह चिपळूण तालुक्यात रविवारी सकाळपासून मुसळधार पावसाची हजेरी लागली. या पावसामुळे चिपळूणमधील प्रसिद्ध सवतसडा धबधबा प्रवाहित झाला असून निसर्गप्रेमी आणि पर्यटकांसाठी तो पुन्हा एकदा आकर्षणाचे केंद्र ठरला आहे.
सकाळपासून सुरू असलेल्या संततधार पावसामुळे डोंगररांगांमधून मोठ्या प्रमाणात पाणी वाहू लागले आहे. त्याचा परिणाम म्हणून उंच कड्यावरून मोठ्या वेगाने कोसळणारा सवतसडा धबधबा पूर्ण क्षमतेने प्रवाहित झाला आहे. हिरवागार परिसर, धुक्याची चादर आणि कोसळणाऱ्या पांढऱ्याशुभ्र जलधारेमुळे परिसराचे सौंदर्य खुलून आले असून पर्यटकांना निसर्गाचा अनोखा अनुभव मिळत आहे.
धबधबा प्रवाहित झाल्याची माहिती सोशल मीडियाच्या माध्यमातून पसरताच चिपळूणसह रत्नागिरी, रायगड आणि मुंबई-गोवा महामार्गावरील प्रवाशांनीही या ठिकाणी भेट देण्यास सुरुवात केली आहे. अनेक पर्यटक धबधब्यासमोर छायाचित्रे आणि व्हिडिओ चित्रीकरण करताना दिसून आले. पावसाळ्यात सवतसडा धबधबा हा कोकणातील महत्त्वाच्या पर्यटनस्थळांपैकी एक मानला जात असल्याने येत्या काही दिवसांत येथे पर्यटकांची संख्या आणखी वाढण्याची शक्यता आहे.
दरम्यान, मुसळधार पावसामुळे धबधबा परिसरातील दगड निसरडे झाले असून पाण्याचा प्रवाहही वेगवान झाला आहे. त्यामुळे पर्यटकांनी धबधब्याच्या अतिजवळ जाणे, पाण्यात उतरणे किंवा धोकादायक ठिकाणी सेल्फी काढणे टाळावे, असे आवाहन स्थानिक नागरिकांकडून करण्यात येत आहे. सुरक्षिततेचे नियम पाळून निसर्गसौंदर्याचा आनंद घ्यावा, असेही आवाहन करण्यात आले आहे.
मान्सूनच्या पुनरागमनामुळे चिपळूण तालुक्यातील नद्या, ओढे आणि धबधबे प्रवाहित झाले असून शेतकऱ्यांमध्येही समाधानाचे वातावरण आहे. भातलावणीच्या कामांना वेग येण्याची अपेक्षा व्यक्त केली जात असून पावसामुळे संपूर्ण परिसरात नवचैतन्य निर्माण झाले आहे.
