देवरूखच्या उपनगराध्यक्षपदी वैभव पवार बिनविरोध
संगमेश्वर : तालुक्यातील देवरूख नगर पंचायतीच्या उपनगराध्यक्षपदासाठी शिवसेनेचे (शिंदे) वैभव पवार यांची उपनगराध्यक्षपदी बिनविरोध निवड करण्यात आली. तसेच स्विकृत नगरसेवक म्हणून महायुतीकडून भाजपाचे रूपेश भागवत, तर मनसेचे शहराध्यक्ष सागर संसारे यांची निवड झाली.
पालिकेच्या छ.शिवाजी महाराज सभागृहामध्ये झालेल्या या पहिल्या सभेमध्ये उपनराध्यक्षपदासाठी निवडणूक झाली. या निवडणुकीसाठी सत्ताधारी महायुतीकडून शिवसेनेचे वैभव पवार यांनी उमेदवारी अर्ज दाखल केला; मात्र विरोधी पक्षांकडून उपनगराध्यक्षपदाच्या निवडणुकीसाठी एकही उमेदवारी अर्ज दाखल झाला नसल्याने त्यांची उपनगराध्यक्षपदी बिनविरोध निवड झाली.
निवडणुकीत महायुतीने वर्चस्व राखले आहे. थेट लोकनियुक्त नगराध्यक्ष म्हणून भाजपाच्या मृणाल शेट्ये निवडून आल्या होत्या. निवडणुकीनंतर देवरूख नगर पंचायतीची पहिली सर्वसाधारण सभा नगराध्यक्ष मृणाल शेट्ये यांच्या अध्यक्षतेखाली झाली. यावेळी नगरपंचायतीचे मुख्याधिकारी प्रशांत भोसले, कार्यालयीन अधीक्षक राणे यांसह सर्व नगरसेवक उपस्थित होते.
दोन जागांवरील स्वीकृत नगरसेवकांचीही यावेळी निवड करण्यात आली. त्यामध्ये सत्ताधाऱ्यांकडून भाजपाचे रूपेश भागवत यांच्या नावाची शिफारस करण्यात आली होती, तर राष्ट्रवादीकडून मनसेच्या सागर संसारे यांच्या नावाची शिफारस करण्यात आली होती. त्याप्रमाणे भागवत व संसारे यांची स्वीकृत नगरसेवक म्हणून निवड झाली.
नूतन उपनगराध्यक्ष वैभव पवार स्वीकृत नगरसेवक रूपेश भागवत, सागर संसारे यांचे नगराध्यक्ष मृणाल शेट्ये यांच्यासह सर्व नगरसेवकांनी अभिनंदन केले. उपनगराध्यक्ष पदावर विराजमान झालेवर वैभव पवार यांनी आपण सर्व सदस्यांनी एकसंघपणे काम करून देवरूख शहराच्या विकासासाठी प्रयत्न करू या असे आवाहन केले.
