सप्रे स्मृती राज्य निवड फिडे क्लासिकल मानांकन बुद्धिबळ स्पर्धा १६-१८ जानेवारी रोजी

रत्नागिरी जिल्हा बुद्धिबळ संघटना व केजीएन सरस्वती फाऊंडेशनच्या संयुक्त विद्यमाने रत्नागिरीत प्रथमच क्लासिकल फिडे मानांकन स्पर्धेचे आयोजन

रत्नागिरी : भारताचे पहिले राष्ट्रीय बुद्धिबळ विजेतेपद पटकावणारे कै. रामचंद्र सप्रे यांच्या स्मृती प्रीत्यर्थ एच टू ई पॉवर सिस्टिम्स महाराष्ट्र राज्य निवड (अमेच्युअर ग्रुप) फिडे मानांकन बुद्धिबळ स्पर्धेचे आयोजन करण्यात आले आहे. ही स्पर्धा १६-१८ जानेवारी दरम्यान मराठा भवन मंगल कार्यालय माळ नाका, रत्नागिरी येथे होणार आहे. या स्पर्धेत विविध वयोगट, रेटिंग कॅटेगरी आणि महिला व वरिष्ठ खेळाडू अशा गटांत रोख रक्कम, चषक अशी बक्षिसे देण्यात येणार आहेत.
मुळचे रत्नागिरीचे कै. सप्रे यांच्या या उदंड कार्याला आदरांजली म्हणून दिलीप नवरे यांच्या संकल्पनेतून या स्पर्धेला २०१३ साली सुरुवात झाली. के. जी. एन सरस्वती फाउंडेशन, कऱ्हाडे ब्राम्हण संघाचे अध्यक्ष माधव हिर्लेकर, चेसमेन रत्नागिरी संस्थेचे कै. दिलीप टिकेकर व प्रसन्न आंबुलकर यांच्या अथक प्रयत्नांनी ही स्पर्धा उत्तरोत्तर नावारूपाला आली आणि दक्षिण महाराष्ट्रातील तसेच मुंबई पुण्यातील खेळाडूंच्या पसंतीस उतरू लागली.
२०१५ व २०२० साली फिडे मानांकन जलद स्पर्धा आयोजित करण्यात आली होती. ह्यावर्षी रत्नागिरी जिल्हा बुद्धिबळ संघटना आणि केजीएन सरस्वती फाऊंडेशन यांचे संयुक्त विद्यमाने ही स्पर्धा आयोजित करण्यात येत आहे. क्लासिकल टाइम कंट्रोल प्रकारात आयोजित करण्यात येत असलेली ही रत्नागिरीच्या बुद्धिबळ इतिहासातील पहिलीच फिडे मानांकन स्पर्धा आहे. एच टू ई पॉवर सिस्टिम्स ह्या कंपनीकडून वर्षभरातील सर्व राज्य निवड स्पर्धांना एकूण बक्षीस रक्कमेच्या ५० टक्के रक्कमेचे प्रायोजकत्व मिळाले आहे.
भारतीय बुद्धिबळ संघाचा प्रशिक्षक ग्रँडमास्टर नारायणन श्रीनाथ, आंतरराष्ट्रीय मास्टर नुबेरशाह शेख, आंतरराष्ट्रीय मास्टर सम्मेद शेटे, उझबेकिस्तानचा ग्रँडमास्टर अब्दुमलीक अब्दीसलीमोव्ह ( ऑनलाईन स्पर्धा ) अशा नामांकित खेळाडूंनी पूर्वी सप्रे स्मृती स्पर्धेचे विजेतेपद प्राप्त केले आहे.
कै. रामभाऊ सप्रे यांच्या कार्याला दंडवत म्हणून आम्ही गेली ११ वर्षे सलग ह्या स्पर्धेला सहकार्य करत आलो असून यापुढेही ही स्पर्धा घेण्यासाठी प्रयत्नशील राहू असे श्री. हिर्लेकर यांनी सांगितले.
कोणत्याही बुद्धिबळ खेळाडूच्या आयुष्यात फिडे मानांकन मिळवणे हा पुढील वाटचाली साठी पहिला टप्पा असतो. आपले खाते जागतिक गुणतालिका स्तरावर उघडून त्यात जितकी जास्त भर तो खेळाडू घालतो तितका तो नावाजला जावू लागतो. त्यामुळे रत्नागिरी जिल्ह्यातील बुद्धिबळपटूंनी या स्पर्धेत सहभाग नोंदवावा आणि आपला कस पणाला लावून फिडे मानांकन मिळवावे असे आवाहन रत्नागिरी जिल्हा बुद्धिबळ संघटनेचे अध्यक्ष श्रीराम खरे यांनी केले आहे.

स्पर्धेच्या अधिक माहितीसाठी विवेक सोहनी व चैतन्य भिडे यांच्याशी संपर्क साधावा, असे आवाहन जिल्हा बुद्धिबळ संघटनेकडून करण्यात आले आहे.

कै. सप्रे यांची संक्षिप्त कारकीर्द :

१. जागतिक बुद्धिबळ ऑलिम्पियाड १९५६ व १९६० या दोन वर्षी प्रथम व द्वितीय बोर्ड वर प्रतिनिधित्व
२. १९५५ साली पहिल्या भारतीय राष्ट्रीय विजेतेपद स्पर्धेचे अजिंक्यपद
३. १९५४ मध्ये मॉस्को येथे बॉटविनिक – स्मिस्लोव्ह यांच्यातील जागतिक अजिंक्यपद सामना पाहण्यासाठी सोव्हिएत संघाच्या सरकारचे पाहुणे
४. बॉम्बे राज्य बुद्धिबळ संघटना आणि महाराष्ट्र बुद्धिबळ संघटनेच्या व्यवस्थापन समितीचे अनेक वर्षे सदस्य
५. स्पर्धा संचालक – राष्ट्रीय अजिंक्यपद स्पर्धा पाटणा (१९७५), भीलवाडा ट्रॉफी – भोपाळ (१९७९), दिल्ली (१९८२)
६. लेखन : ‘इंडियन एक्सप्रेस’ (४० वर्षे), ‘मिड-डे’, ‘संडे ऑब्झर्व्हर’, ‘चेस मेट’, ‘स्पोर्ट्स वीक’, ‘इलस्ट्रेटेड वीकली ऑफ इंडिया’ साठी बुद्धिबळविषयक लेखक
७. प्रशिक्षण: रुईया आणि पोद्दार कॉलेज, मुंबईसाठी ५ वर्षे प्रशिक्षक; तीन डब्ल्यूआयएम खाडिलकर भगिनींना काही काळ प्रशिक्षण दिले, आंतरराष्ट्रीय मास्टर अरुण वैद्य यांना काही काळ प्रशिक्षण दिले.