दीड लाख रुपयांचे वीज बिल थकवले आणि वीज बिलाची रक्कम न भरता विजेचा गैरवापर, आरोपीवर गुन्हा दाखल
रत्नागिरी जिल्ह्यातील खेड तालुक्यात दीड लाख रुपये किंमतीच्या वीज बिलाची थकबाकी ठेवून वीज चोरी केल्याप्रकरणी मधुकर कृष्णा साळुंखे या व्यक्तीवर खेड पोलीस ठाण्यात गुन्हा दाखल करण्यात आला आहे. महावितरणचे अधिकारी निखिल बेडेकर यांनी या प्रकरणी तक्रार दाखल केली असून, ही घटना २७ मार्च २०२४ रोजी घडल्याचे तक्रारीत नमूद आहे. वीज चोरीच्या या प्रकरणामुळे परिसरात खळबळ उडाली आहे.
मधुकर साळुंखे हा भरणे आठवडा बाजार परिसरात वास्तव्यास होता. त्याने दीड लाख रुपयांचे वीज बिल थकवले आणि वीज बिलाची रक्कम न भरता विजेचा गैरवापर केल्याचा आरोप आहे. या प्रकरणी महावितरणने भारतीय विद्युत अधिनियम २००३ च्या कलम १३५ अंतर्गत कारवाईची मागणी केली होती. यासंदर्भात १२ मार्च २०२५ रोजी खेड पोलीस ठाण्यात ई-तक्रार प्राप्त झाली होती. त्यानंतर पोलिसांनी महावितरणच्या सहाय्यक अभियंत्यांना तक्रार देण्यासाठी पत्र पाठवले होते. मंगळवारी, निखिल बेडेकर यांनी पोलीस ठाण्यात औपचारिक तक्रार नोंदवली, ज्यानंतर मधुकर साळुंखे याच्यावर गुन्हा दाखल करण्यात आला.
