चिपळूण शहरानजिक पेढे-फरशी तिठा येथे पाईपलाईन दुरूस्ती ३६ तासानंतर पूर्ण

चिपळूण तालुक्यात सोमवारी रात्री पेढे-फरशी तिठा येथे फुटलेल्या पाईपलाईनच्या दुरूस्तीचे काम एमआयडीसीने युद्धपातळीवर हाती घेत बुधवारी सायंकाळी ३६ तासानंतर पूर्णत्वास नेले, परिणामी २ दिवसानंतर लोटे औद्योगिक वसाहतीसह परिसरातील अकरा गावांचे पाणीपुरवठा सुरळीत करण्यात एमआयडीसीला यश आले आहे.
लोटे औद्योगिक वसाहतीतील कारखान्यांसह परिसरातील असंख्य गावांना वाशिष्ठी नदीवरील वालोपे येथील एमआयडीसी पंपहाऊसमधून पाणीपुरवठा करणारी पाईपलाईन सोमवारी रात्री पेढे येथे फुटल्यानंतर तेथील २ दुकानांची नासधूस होवून ७ लाखांचे नुकसान झाले. महसूल यंत्रणेकडून पंचनामा करण्यात आला असून नियमानुसार मदतीचे आश्‍वासन दिले गेले आहे. घटनेनंतर एमआयडीसीने मंगळवारी सकाळी पाईपलाईन दुरूस्तीचे काम हाती घेतले. बुधवारी सायंकाळी काम पूर्ण झाल्यानंतर पहिला पंप सुरू करण्यात आला. यासाठी एमआयडीसीचे अधिकारी तसेच ठेकेदार कंपनीच्या कर्मचार्‍यांनी ३० तासाहून अधिक काळ न थांबता काम केले. गुरुवारी सकाळपासून लोटे एमआयडीसी क्षेत्रासह परिसरातील गावांचा पाणीपुरवठा सर्वच ठिकाणी सुरळीत होईल, असे एमआयडीसीच्या अधिकार्‍यांकडून सांगण्यात आले.www.konkantoday.com