प्रसिद्ध रांगोळीकार संतोष केतकर यांच्या रांगोळीतही मुंबई-गोवा महामार्गाच्या दुर्दशेचे प्रतिबिंब

मुंबई-गोवा महामार्गाच्या दुर्दशेचा आवाज आता कलात्मक माध्यमातून ऐकवला गेला आहे. शहरातील भोगाळे येथील श्री सार्वजनिक गणेशोत्सव मंडळाच्या मैदानात प्रसिद्ध रांगोळीकार संतोष केतकर यांच्या कलाकृतीतून या दुर्दशेचे प्रतिबिंब उमटले आहे. महामार्गाच्या खड्ड्यातून होणार्‍या गणरायाच्या प्रवासाची रांगोळी साकारत कोकणवासियांच्या संतापाला वेगळ्या माध्यमातून वाट मोकळी करून दिली आहे.
संतोष केतकर हे केवळ रांगोळी साकारत नाहीत, तर आपल्या कलेच्या माध्यमातून सामाजिक, सांस्कृतिक आणि राजकीय विषयांवर सातत्याने भाष्य करतात. याआधी त्यांनी डॉ. बाबासाहेब आंबेडकर, विनायक दामोदर सावरकर यांचे प्रतिबिंब रांगोळीच्या माध्यमातून साकारले होते तसेच नवा कालभैरव मंदिरात त्यांनी हलती रांगोळी साकारत प्रभाकर जोग यांच्या व्हायोलिन वादनाचे दृश्य साकारले होते. यामुळे त्यांची इंडिया बुक ऑन रेकॉर्डस २०२२ मध्ये नोंद झाली होती.
यावर्षीच्या श्री सार्वजनिक गणेशोत्सव मंडळाच्या रांगोळीमध्ये महामार्गावरील खड्ड्यांचा सखोल आकृतीतून प्रत्यक्ष अनुभव दाखवला आहे. गणपती बाप्पाच्या हातात ठेवलेल्या फलकांवर लिहिले आहे, चला गणराया, पहा रस्ता खड्डे मोजू चला, तसेच जास्त खड्डे, जास्त निधी, असे संदेश देवून त्यांनी ठेकेदारांनाही टोला लगावला आहे. ही रांगोळी प्रवाशांच्या दैनंदिन संघर्षाचे, प्रशासनाच्या दुर्लक्षाचे आणि समाजातील संतापाचे सजीव दृष्य तयार केले आहे.www.konkantoday.com