प्रशासनाचा ‘क्रीज’ सोडून जिल्हाधिकारी मनुज जिंदल ‘पीच’ वरजिल्हा क्रीडा अधिकाऱ्यांच्या बाॕलवर जिल्हाधिकाऱ्यांचा ‘चौकार’शालेय राज्यस्तरीय क्रिकेट स्पर्धेच्या उद्घाटनात रंगला आगळावेगळा क्षण
*रत्नागिरी, दि. २२ : नेहमी फाईलींची पाने उलटणारे हात जेव्हा चेंडूचा वेध घेण्यासाठी बॅट हातात तोलतात, तेव्हा मैदानावर केवळ खेळ उरत नाही, तर तिथे साधेपणा आणि उत्कटतेची एक सुरेख मैफल सजते. छत्रपती शिवाजी महाराज स्टेडियमवर आजच्या असाच एक रम्य प्रसंग पाहायला मिळाला. राज्यस्तरीय १९ वर्षांखालील शालेय क्रिकेट स्पर्धेच्या उद्घाटनासाठी उपस्थित असलेले जिल्हाधिकारी मनुज जिंदल यांनी केवळ नारळ वाढवून आणि फित कापून औपचारिकता आटोपली नाही, तर थेट २२ यार्डांच्या खेळपट्टीवर उतरून निखळ फलंदाजीचा आनंद लुटला. जिल्हा क्रीडा आधिकारी विजय शिंदे यांनी टाकलेल्या चेंडूवर थेट चौकार मारला.
मैदानाचे विधीवत पूजन झाल्यानंतर जिल्हाधिकाऱ्यांनी हातांत बॅट घेतली. एकीकडे प्रशासनाची पोक्त चौकट आणि दुसरीकडे खेळाडूवृत्तीचा सहज संचार… त्यांनी स्टान्स घेतला आणि समोरून आलेल्या चेंडूला अत्यंत नजाकतीने, वेळेचा अचूक अंदाज घेत बॅटच्या मधोमध टोलवले. लाकडी बॅटवर आदळलेल्या त्या चेंडूचा ‘ठक’ असा आवाज..अन् तो बाऊंड्री पार झाला. मैदानाभोवती उभ्या असलेल्या युवा खेळाडू, पंच आणि क्रीडारसिकांच्या उत्साहाला उधाण आले.
त्यांच्या प्रत्येक फटक्यागणिक उमटणारा टाळ्यांचा कडकडाट मैदानाची ऊर्जा कैक पटींनी वाढवून गेला. एका कसलेल्या फलंदाजाप्रमाणे शरीराचा तोल सांभाळत त्यांनी खेळलेले फटके पाहून, ‘प्रत्येकाच्या अंतर्मनात एक खेळाडू सदैव जागत असतो,’ याचीच साक्ष उपस्थितांना पटली.
आपल्या व्यस्त प्रशासकीय कामकाजातून वेळ काढून थेट खेळपट्टीवर बॅट चालवणाऱ्या जिल्हाधिकाऱ्यांचा हा खेळकर अंदाज उपस्थितांची मने जिंकून गेला.
स्पर्धेसाठी महाराष्ट्राच्या आठही विभागांतून आलेल्या तरुण खेळाडूंसाठी हा क्षण केवळ कौतुकाचा नव्हे, तर आत्मविश्वासाला बळ देणारा ठरला.
आपल्या कृतीतून त्यांनी जणू हाच मूक संदेश दिला की—आयुष्याचा डाव खेळताना नियम आणि शिस्त जितकी महत्त्वाची, तितकाच खेळातील दिलखुलासपणा आणि मैदानावरील उत्साहही जगण्याला नवी उभारी देणारा असतो. जिल्हाधिकाऱ्यांच्या या अनपेक्षित आणि देखण्या बॅटिंगने स्पर्धेच्या पहिल्याच दिवसाची सुरुवात अविस्मरणीय ठरवली.
*महाराष्ट्रातील आठ सर्वोत्तम विभागांची चुरस*
राज्यातील क्रिकेटपटूंच्या गुणवत्तेला व्यासपीठ मिळवून देणाऱ्या या मानाच्या स्पर्धेत महाराष्ट्रातील आठ विभागांतील अव्वल संघ सहभागी झाले आहेत:
सहभागी संघ: कोल्हापूर, मुंबई, नाशिक, अमरावती, नागपूर, छत्रपती संभाजीनगर, लातूर आणि पुणे विभाग.
पहिल्या दिवसाचा रणसंग्राम: सामन्यांचे निकाल
सामना १: पुणे विभागाचा अमरावतीवर दणदणीत विजय
नाणेफेक: पुणे विभागाने नाणेफेक जिंकून प्रथम क्षेत्ररक्षणाचा (गोलंदाजी) अचूक निर्णय घेतला.
अमरावती विभागाचा डाव: पुण्याच्या शिस्तबद्ध माऱ्यापुढे अमरावतीचा संघ निर्धारित १० षटकांत ९ बाद ३७ धावांवर मर्यादित राहिला. पुण्याच्या रुषभ मोरे याने भेदक मारा करत ३ फलंदाजांना माघारी धाडले.
पुणे विभागाचा डाव: ३८ धावांचे माफक आव्हान पुणे संघाने अवघ्या २.३ षटकांत एकही गडी न गमावता ४४ धावा फटकावून सहज पूर्ण केले. पुण्याच्या नेहाल मुल्ला याने अवघ्या १२ चेंडूंमध्ये नाबाद २८ धावांची फटकेबाजी करत संघाच्या एकतर्फी विजयावर शिक्कामोर्तब केले.
सामना २: चुरशीच्या लढतीत मुंबईचा कोल्हापूरवर रोमहर्षक विजय
नाणेफेक: कोल्हापूर विभागाने नाणेफेक जिंकून फलंदाजी स्वीकारली.
कोल्हापूर विभागाचा डाव: कोल्हापूरच्या फलंदाजांनी संयमी व आक्रमक खेळ करत १० षटकांत २ बाद ९८ धावांचा मजबूत डोंगर उभारला. यामध्ये पृथ्वेश जाधव याने झंझावाती ४६ धावांचे महत्त्वपूर्ण योगदान दिले.
मुंबई विभागाचा डाव: विजयासाठी मिळालेल्या ९९ धावांच्या आव्हानाचा पाठलाग करताना मुंबईच्या फलंदाजांनी शेवटच्या चेंडूपर्यंत रंगलेल्या या लढतीत १० षटकांत ३ गडी गमावून १०० धावा करत थरारक विजय नोंदवला. मुंबईच्या विजयाचा शिल्पकार ठरलेल्या ओम् बांगर याने ६० धावांची तुफानी खेळी साकारत मैदानावर चौफेर फटकेबाजीचे प्रदर्शन केले.
या उद्घाटनप्रसंगी निवड समिती सदस्य सर्वेश देशमुख, दीपक मोरे, संदीप गावंडे, तालुका क्रीडा अधिकारी सुनील धारूरकर, क्रीडा अधिकारी गणेश खैरमोडे, सुनील कोळी आणि गणेश जगताप यांच्यासह पंच व क्रीडाप्रेमी उपस्थित होते.
