कोकण रेल्वेच्या बिगर पावसाळी वेळापत्रकात बदल

कोकण रेल्वे मार्गावरील बिगर पावसाळी वेळापत्रकानुसार सात रेल्वेगाड्यांच्या आगमन आणि प्रस्थानाच्या वेळांमध्ये बदल करण्यात आला आहे.
कोकण रेल्वे प्रशासनाने २१ ऑक्टोबर २०२६ रोजी प्रसिद्धीपत्रकाद्वारे ही माहिती दिली. सुधारित वेळा संबंधित गाड्यांच्या प्रवासाच्या तारखांनुसार लागू होणार आहेत.

१. सुरत-मंगळुरू द्विसाप्ताहिक एक्स्प्रेस (१९०५७)

या गाडीच्या मडगाव जंक्शनवरील वेळेत बदल करण्यात आला आहे. २१ ऑक्टोबर रोजी गाडी दुपारी १२.२० वाजता पोहोचेल आणि १२.३० वाजता सुटेल. यापूर्वी आगमनाची वेळ १२.४०, तर प्रस्थानाची वेळ १२.५० होती.

२. लोकमान्य टिळक टर्मिनस-करमळी एक्स्प्रेस (२२११५)

या गाडीची रत्नागिरी स्थानकावरील वेळ बदलण्यात आली आहे. २२ ऑक्टोबर रोजी गाडी सकाळी ६.१५ वाजता पोहोचेल आणि ६.२० वाजता सुटेल. यापूर्वी ही गाडी सकाळी ६ वाजता पोहोचून ६.०५ वाजता सुटत होती.

३. लोकमान्य टिळक टर्मिनस-मडगाव एक्स्प्रेस (११०९९)

या एक्स्प्रेसच्या रत्नागिरी स्थानकावरील वेळेत बदल करण्यात आला आहे. २३ ऑक्टोबर रोजी गाडी सकाळी ६.१५ वाजता पोहोचेल आणि ६.२० वाजता पुढील प्रवासासाठी रवाना होईल. यापूर्वीची वेळ सकाळी ६ ते ६.०५ अशी होती.
४. मडगाव-नागपूर द्विसाप्ताहिक एक्स्प्रेस (११२०४)

या गाडीच्या करमळी, थिवीम आणि संगमेश्वर रोड स्थानकांवरील वेळांमध्ये बदल करण्यात आला आहे. २२ ऑक्टोबरच्या प्रवासासाठी सुधारित वेळापत्रकानुसार करमळी येथे रात्री ८.२८ वाजता आगमन आणि ८.३० वाजता प्रस्थान होईल. थिवीम येथे रात्री ८.४६ वाजता आगमन आणि ८.४८ वाजता प्रस्थान होईल. संगमेश्वर रोड येथे २३ ऑक्टोबर रोजी पहाटे १.१६ वाजता आगमन आणि १.१८ वाजता प्रस्थान होईल.

५. एर्नाकुलम-अजमेर ‘मरुसागर’ एक्स्प्रेस (१२९७७)

या गाडीच्या सिंधुदुर्ग स्थानकावरील वेळेत बदल करण्यात आला आहे. २५ ऑक्टोबर रोजी गाडी दुपारी १२.४० वाजता पोहोचेल आणि १२.४२ वाजता सुटेल. यापूर्वी गाडीची वेळ दुपारी १.४० ते १.४२ अशी होती. त्यामुळे या स्थानकावर गाडी एक तास आधी येणार आहे.

६. पाटणा-वास्को द गामा साप्ताहिक एक्स्प्रेस (१२४७२)
या गाडीच्या मडगाव आणि वास्को द गामा स्थानकांवरील वेळांमध्ये बदल करण्यात आला आहे. २४ ऑक्टोबर रोजी मडगाव येथे गाडी पहाटे ३ वाजता पोहोचेल आणि ३.३० वाजता सुटेल. वास्को द गामा येथे गाडी सकाळी ५.४५ वाजता पोहोचेल. प्रसिद्धीपत्रकानुसार, वास्को द गामा स्थानकावरील पूर्वीची वेळ पहाटे ४.३५ अशी नमूद करण्यात आली आहे.

७. पुणे-एर्नाकुलम एक्स्प्रेस (११०९७)

या गाडीच्या मडगाव जंक्शनवरील वेळेत बदल करण्यात आला आहे. २४ ऑक्टोबर रोजी गाडी दुपारी १२.५५ वाजता पोहोचेल आणि १.३५ वाजता सुटेल. यापूर्वीही आगमनाची वेळ दुपारी १२.५५ होती; मात्र प्रस्थानाची वेळ दुपारी १.१५ होती.

प्रवाशांनी नोंद घ्यावी

कोकण रेल्वे प्रशासनाने प्रवाशांना सुधारित वेळापत्रकाची नोंद घेण्याचे आवाहन केले आहे. प्रवासाला निघण्यापूर्वी संबंधित गाडीच्या आगमन आणि प्रस्थानाच्या वेळांची अधिकृत रेल्वे संकेतस्थळावर खात्री करून घ्यावी.