गणेशोत्सवाच्या पार्श्वभूमीवर नगरसेवक दिलीप चव्हाण यांची तत्परता

राजापूर : गणेशोत्सवाच्या पार्श्वभूमीवर शहरातील मुख्य रस्त्यावरील स्ट्रीट लाईटच्या प्रकाशात अडथळा निर्माण करणाऱ्या झाडांच्या फांद्या हटविण्यात आल्या. नगरसेवक दिलीप चव्हाण यांनी या समस्येची दखल घेत तत्काळ नगरपरिषदेच्या मुख्याधिकाऱ्यांशी संपर्क साधून आवश्यक कार्यवाहीसाठी पाठपुरावा केला.
मुख्य रस्त्यावरील काही स्ट्रीट लाईटसमोर झाडांच्या फांद्या मोठ्या प्रमाणात वाढल्याने रात्रीच्या वेळी रस्त्यावर पुरेसा प्रकाश पडत नव्हता. गणेशोत्सवाच्या काळात नागरिकांसह वाहनांची वर्दळ वाढणार असल्याने सुरक्षिततेच्या दृष्टीने हा प्रश्न तातडीने सोडविणे आवश्यक होते.
ही बाब निदर्शनास येताच नगरसेवक दिलीप चव्हाण यांनी स्वतः पुढाकार घेत नगरपरिषदेच्या मुख्याधिकाऱ्यांना याची माहिती दिली. त्यानंतर सुरक्षिततेच्या दृष्टीने महावितरणकडून संबंधित वीजवाहिनीवरील वीजपुरवठा तात्पुरता बंद करण्यात आला. नगरपरिषद कर्मचाऱ्यांच्या मदतीने स्ट्रीट लाईटच्या प्रकाशात अडथळा निर्माण करणाऱ्या झाडांच्या फांद्या हटविण्यात आल्या.
फांद्या हटविल्यानंतर मुख्य रस्त्यावरील स्ट्रीट लाईटचा प्रकाश पूर्ववत झाला असून, गणेशोत्सवाच्या काळात रात्रीच्या वेळी नागरिकांना अधिक सुरक्षितपणे ये-जा करणे शक्य होणार आहे. नगरसेवक दिलीप चव्हाण यांनी प्रत्यक्ष घटनास्थळी उपस्थित राहून सुरू असलेल्या कामाची पाहणी केली.
गणेशोत्सवाच्या पार्श्वभूमीवर नागरिकांच्या सुरक्षिततेच्या दृष्टीने नगरसेवक दिलीप चव्हाण यांनी दाखविलेल्या तत्परतेमुळे नागरिकांनी समाधान व्यक्त केले आहे.