संभाजीनगर येथील प्रती पंढरपूर येथे उद्योगमंत्री उदय सामंत यांच्या हस्ते विठ्ठल-रुक्मिणीचा महाभिषेक
छत्रपती संभाजीनगर : आषाढी एकादशीच्या पावन पर्वानिमित्त छत्रपती संभाजीनगर येथील प्रती पंढरपूर म्हणून ओळखल्या जाणाऱ्या श्री विठ्ठल-रुक्मिणी मंदिर संस्थानमध्ये आयोजित महाभिषेक व विशेष पूजेचा मान राज्याचे उद्योग व मराठी भाषा मंत्री तथा शिवसेना उपनेते उदय सामंत यांना लाभला.
मध्यरात्री बारा वाजता उदय सामंत यांनी विठ्ठल-रुक्मिणीची विधिवत पूजा-अर्चा करून महाभिषेक केला. यावेळी त्यांनी विठुरायाच्या चरणी महाराष्ट्रातील जनतेच्या सुख-समृद्धीसाठी, राज्यात शांतता नांदावी, शेतकरी समृद्ध व्हावेत तसेच कष्टकरी वर्गाच्या हाताला कायमस्वरूपी काम मिळावे, अशी प्रार्थना केली.
या धार्मिक सोहळ्याला खासदार संदीपान भुमरे, श्री विठ्ठल-रुक्मिणी मंदिर संस्थानचे अध्यक्ष राजेंद्र पवार यांच्यासह मंदिर संस्थानचे पदाधिकारी, मान्यवर आणि वारकरी मोठ्या संख्येने उपस्थित होते. भक्तिमय वातावरणात पार पडलेल्या या महाभिषेक सोहळ्याला भाविकांचा उत्स्फूर्त प्रतिसाद लाभला.
