*चिपळूणात माजी खासदार विनायक राऊत आणि भास्कर जाधव यांच्यात विसंवाद, जाधवांना मातोश्रीवरून समज?*_____

चिपळूण नगर पालिकेच्या निवडणुकीच्या पार्श्वभूमीवर शिवसेना ठाकरे गटात मोठी खळबळ उडाली आहे. पक्षाच्या अधिकृत उमेदवारांना पाठिंबा न देता राष्ट्रवादी काँग्रेस (शरद पवार गट) चे उमेदवार रमेश कदम यांचा प्रचार करणारे ठाकरे गटाचे आमदार भास्कर जाधव यांना मातोश्रीवरून समज दिल्याची माहिती वरिष्ठ सूत्रांनी दिली आहे.

नगराध्यक्ष पदासह २४ नगरसेवक पदांवर ठाकरे गटाने स्वतःचे उमेदवार उभे केले असतानाही जाधव यांनी पत्रकार परिषद घेत राष्ट्रवादीचे उमेदवार रमेश कदम यांना सार्वजनिक पाठिंबा जाहीर केला. “स्थानिक पदाधिकाऱ्यांच्या विनंतीनुसार निवडणुकीतील तिढा सोडवण्यासाठी पुढे आलो. शब्द दिल्याने आता परिणामांची चिंता न करता रमेश कदम यांच्या प्रचारात राहणार,” असे ते म्हणाले होते.
या भूमिकेमुळे शिवसेना ठाकरे गटात तीव्र नाराजी उसळली आहे.

गेल्या काही महिन्यांपासून शिवसेनेचे जिल्हाप्रमुख व माजीखासदार विनायक राऊत आणि भास्कर जाधव यांच्यातील विसंवाद वाढत असल्याची चर्चा होती. या अंतर्गत मतभेदाचा विस्फोट आता निवडणुकीच्या तोंडावर स्पष्ट दिसत आहे. विनायक राऊत यांच्या अलीकडील चिपळूण दौऱ्यानंतरही जाधव यांची नाराजी कायम असल्याचे चित्र होते. या संपूर्ण घडामोडींचा अहवाल थेट मातोश्रीपर्यंत पोहोचला असून, उच्च पातळीवरून भास्कर जाधव यांच्याशी संपर्क साधण्यात आल्याचे सूत्रांचे म्हणणे आहे.

माहितीनुसार, मातोश्रीकडून जाधव यांना “पक्षाला नुकसान होईल असे पाऊल उचलू नका” असा स्पष्ट सल्ला देण्यात आला आहे. दरम्यान, जाधव यांनी काल दिवसभर रमेश कदम यांच्या प्रचारात सहभाग घेतला. आता मातोश्रीवरून समज मिळाल्यानंतर ते पुढे कोणती भूमिका घेणार याकडे सर्वांचे लक्ष लागून आहे.
www.konkantoday.com