ठेकेदारांच्या आर्थिक वादात रुग्णांची उपासमार!

कळंबणी उपजिल्हा रुग्णालयातील ३० रुग्णांना सायंकाळचे जेवणच नाही; थकीत बिलांमुळे भोजनपुरवठा विस्कळीत

खेड : उपचारासाठी रुग्णालयात दाखल झालेल्या रुग्णांना वेळेवर औषधोपचारांसोबत पुरेसे आणि सकस अन्न मिळणे अपेक्षित असते. मात्र, खेड तालुक्यातील कळंबणी उपजिल्हा रुग्णालयात सुमारे ३० रुग्णांवर सायंकाळी जेवणाविना राहण्याची वेळ आल्याची धक्कादायक घटना समोर आली आहे. भोजनपुरवठा करणाऱ्या ठेकेदाराचे पैसे थकल्याने जेवणाची व्यवस्था कोलमडल्याचे सांगण्यात येत असून, या प्रकारामुळे रुग्णालयाच्या भोजनव्यवस्थेचा कारभार ऐरणीवर आला आहे.

ठेकेदारांची बिले थकीत, त्याची शिक्षा रुग्णांना का?

मिळालेल्या माहितीनुसार, रुग्णालयातील भोजनपुरवठ्याची जबाबदारी सांभाळणाऱ्या उपठेकेदाराला मुख्य ठेकेदाराकडून पेमेंट मिळालेले नाही. दुसरीकडे, संबंधित भोजनपुरवठा ठेकेदाराची शासनाकडे चार महिन्यांहून अधिक काळाची बिले थकीत असल्याची माहिती पुढे आली आहे. आर्थिक व्यवहारांतील या अडचणींमुळे भोजनपुरवठ्यावर परिणाम झाल्याचे सांगितले जात आहे. मात्र, या सगळ्या घडामोडींमध्ये उपचारासाठी रुग्णालयात दाखल झालेल्या रुग्णांना जेवणाविना राहावे लागणे ही गंभीर बाब मानली जात आहे.

दुपारचे जेवण मिळाले; सायंकाळी मात्र प्रतीक्षाच!

कळंबणी उपजिल्हा रुग्णालयात खेड तालुक्यासह परिसरातील अनेक गावांमधून रुग्ण उपचारासाठी दाखल होतात. यामध्ये बाहेरगावांहून आलेल्या रुग्णांचाही समावेश असतो. रुग्णालयात दाखल झालेल्या रुग्णांसाठी भोजनाची व्यवस्था ही उपचारप्रक्रियेचाच महत्त्वाचा भाग असते.

मिळालेल्या माहितीनुसार, संबंधित दिवशी रुग्णांना दुपारचे जेवण देण्यात आले होते. मात्र, सायंकाळचे जेवण मिळणार नसल्याची माहिती भोजनपुरवठा करणाऱ्या ठेकेदाराकडून देण्यात आल्याचे समजते. बिलाचे पैसे मिळाले नसल्यामुळे जेवण पुरविणे शक्य नसल्याचे सांगण्यात आले, तर काही रुग्णांना स्वयंपाकासाठी लागणारा गॅस सिलिंडर संपल्याचे कारणही देण्यात आल्याची माहिती पुढे आली आहे.

त्यामुळे भोजनपुरवठा नेमका आर्थिक अडचणींमुळे थांबला की अन्य कारणामुळे विस्कळीत झाला, असा प्रश्न उपस्थित होत आहे.

रुग्णालय प्रशासनाची जबाबदारी काय?

ठेकेदारांची बिले थकीत असतील, तर त्यावर संबंधित विभागाने वेळीच तोडगा काढणे आवश्यक आहे. मात्र, आर्थिक व्यवहारांतील अडचणींचा थेट फटका रुग्णांना बसणे योग्य नाही. रुग्णालयात उपचार घेणाऱ्या रुग्णांना वेळेवर भोजन उपलब्ध करून देण्याची पर्यायी व्यवस्था असणेही तितकेच महत्त्वाचे आहे.

या घटनेमुळे कळंबणी उपजिल्हा रुग्णालयातील भोजनपुरवठा व्यवस्थेच्या नियोजनाबाबत प्रश्न निर्माण झाले आहेत. संबंधित विभागाने या प्रकरणाची चौकशी करून भोजनपुरवठ्यातील अडथळ्यांचे नेमके कारण स्पष्ट करावे, थकीत बिलांचा प्रश्न मार्गी लावावा आणि भविष्यात रुग्णांना अशा प्रकारच्या गैरसोयीला सामोरे जावे लागू नये, यासाठी ठोस उपाययोजना कराव्यात, अशी अपेक्षा व्यक्त होत आहे.

आर्थिक व्यवहारांच्या कचाट्यात रुग्णांचे जेवण अडकणार असेल, तर रुग्णालयातील भोजनव्यवस्थेच्या नियोजनाचा फेरविचार करण्याची वेळ आली आहे.