महामार्गावर मोकाट जनावरांचा वावर; अपघात रोखण्यासाठी तातडीच्या उपाययोजनांची मागणी
रत्नागिरी : जिल्ह्यातील राष्ट्रीय महामार्गासह प्रमुख रस्त्यांवर मोकाट गाई-बैल व इतर जनावरांचा वावर वाढल्याने वाहनचालकांच्या सुरक्षिततेचा प्रश्न गंभीर बनला आहे. विशेषतः रात्रीच्या वेळी अचानक रस्त्यावर येणाऱ्या जनावरांमुळे अपघात होण्याची शक्यता वाढली असून, वाहनांचे नुकसान होण्याबरोबरच मानवी जीवितालाही धोका निर्माण होत आहे. या पार्श्वभूमीवर जिल्हा परिषद सदस्या शिवानी सावंत यांनी जिल्हाधिकारी, पोलीस अधीक्षक आणि जिल्हा परिषदेचे मुख्य कार्यकारी अधिकारी यांच्याकडे पत्राद्वारे तातडीच्या उपाययोजनांची मागणी केली आहे.
अपघात घडल्यानंतर मदत करण्यापेक्षा अपघात होण्यापूर्वीच प्रतिबंधात्मक उपाययोजना करणे आवश्यक असल्याचे सावंत यांनी पत्रात नमूद केले आहे. राष्ट्रीय महामार्गावरील धोकादायक ठिकाणी सुरक्षा कुंपण, आवश्यक सूचना फलक तसेच पुरेशी प्रकाशव्यवस्था करण्यात यावी, अशी मागणी त्यांनी केली आहे.
तसेच संबंधित स्थानिक स्वराज्य संस्था आणि पशुसंवर्धन विभागाच्या समन्वयाने मोकाट जनावरे पकडण्यासाठी विशेष मोहीम राबविण्यात यावी, अशी मागणीही करण्यात आली आहे. रस्त्यावर जनावरे मोकाट सोडणाऱ्या पशुपालकांची जबाबदारी निश्चित करून आवश्यक ती कार्यवाही करण्याची गरज असल्याचेही सावंत यांनी स्पष्ट केले.
या समस्येवर कायमस्वरूपी तोडगा काढण्यासाठी जिल्हाधिकाऱ्यांच्या अध्यक्षतेखाली NHAI, पोलीस, पशुसंवर्धन विभाग आणि संबंधित स्थानिक प्रशासनाची संयुक्त बैठक घेण्यात यावी. या बैठकीत महामार्गावरील मोकाट जनावरांचा प्रश्न, सुरक्षा व्यवस्था आणि प्रतिबंधात्मक उपाययोजनांबाबत ठोस निर्णय घेण्यात यावा, अशी मागणी शिवानी सावंत यांनी केली आहे.
मानवी जीविताबरोबरच मुक्या जनावरांचे संरक्षणही महत्त्वाचे असून, प्रशासनाने या प्रश्नाकडे गांभीर्याने पाहून तातडीने कार्यवाही करावी, अशी अपेक्षा त्यांनी व्यक्त केली आहे.
