“महाराष्ट्रातले दोन कोटी मतदार कायमचे बाद झाले असं समजू नका”; मुख्य निवडणूक अधिकाऱ्यांचं महत्त्वाचं वक्तव्य!

महाराष्ट्रामध्ये जनगणनेची आकडेवारी जाहीर करण्यात आली आहे, त्याचबरोबर राज्यामध्ये सध्या १ जुलैपासून सुरू झालेल्या एसआयआर २०२६ मध्ये आतापर्यत सुमारे २ कोटी ७ लाख मतदारांची नावे ही वगळण्यात आल्याची चर्चा झाली होती. त्याबाबत आता मुख्य निवडणूक आयुक्त एस चोकलिंगम यांनी महत्त्वाची माहिती दिली आहे.

मी प्रत्येक मतदाराला आवाहन करतो की..

चोकलिंगम म्हणाले, माझं प्रत्येक मतदाराला आवाहन आहे की त्यांनी मसुदा मतदार यादी तपासावी. केवळ राज्यभरातील आकड्याकडे पाहू नका. तुमचे स्वतःचे नाव त्यात आहे का आणि तुमचे तपशील बरोबर आहेत का, हे तपासा. नाव नसल्यास, समावेशासाठी अर्ज करा. काही चूक असल्यास, दुरुस्तीची मागणी करा. नाव वगळण्याशी संबंधित काही मुद्दा असल्यास, फॉर्म ६ भरून तुमचे नाव समाविष्ट करण्यासाठी अर्ज करू शकता. मसुदा ही अंतिम यादी नाही. अंतिम मतदार यादीपूर्वी दावे आणि हरकतींची संपूर्ण प्रक्रिया आहे.

दोन कोटी मतदारांबाबत काय म्हणाले निवडणूक अधिकारी?

२ कोटी गोळा न होऊ शकलेल्या EFs चे अंतिम वर्गीकरण काय आहे असं विचारलं असता चोकलिंगम म्हणाले की, ७५.५२ लाख अनुपस्थित किंवा आले नाहीत, ७६.८० लाख कायमस्वरूपी स्थलांतरित झाले आहेत. ३४.८१ लाख मृत, १७.६३ लाख आधीच अन्यत्र नोंदणीकृत/दुबार आणि २.२३ लाख इतर. विविध जिल्हाधिकाऱ्यांच्या वेबसाइटवर मसुदा मतदार याद्या प्रकाशित केल्या जात आहेत, जेणेकरून लोक आपली नावे तपासू शकतील. संबंधित निवडणूक अधिकाऱ्यांमार्फत राजकीय पक्षांच्या बूथ स्तरावरील प्रतिनिधींनाही याद्या उपलब्ध करून दिल्या जात आहेत. मात्र, ही प्रक्रियेची विविध टप्पे आहेत. या टप्प्यावर आम्ही १०० टक्के अचूकतेचा दावा करत नाही असंही त्यांनी स्पष्ट केलं.

BLO बाबत काय भाष्य केलं?

BLO ने मतदाराला किमान एकदा भेट देणे अपेक्षित होते आणि तो व्यक्ती भेटला नाही तर तीन वेळा भेट देणे अपेक्षित होते. त्यानंतर, काय निष्पन्न झाले यावर अवलंबून, प्रकरणाचे वर्गीकरण करण्यात आले. एखादी व्यक्ती अनुपस्थित किंवा संपर्काशिवाय राहिली तर त्या व्यक्तीचे काय झाले आहे, हे आपल्याला माहीत नसते. ती व्यक्ती कुठेतरी स्थलांतरित झालेली असू शकते किंवा अन्य कोणत्याही कारणामुळे अनुपस्थित असू शकते. कायमस्वरूपी स्थलांतरितांच्या बाबतीत, ती व्यक्ती त्या पत्त्यावरून प्रत्यक्षात स्थलांतरित झाल्याची माहिती आमच्याकडे असते. मृत व्यक्तींच्या बाबतीत, मृत्यू प्रमाणपत्रे किंवा कुटुंबीयांकडून मिळालेले अहवाल यांसारख्या अधिकृत मृत्यू नोंदींसह आमच्याकडे उपलब्ध असलेल्या नोंदींवर आम्ही अवलंबून असतो. आधीच अन्यत्र नोंदणीकृत/दुबार या बाबतीत, त्या व्यक्तीचे नाव मतदार यादीतील अन्यत्र दुसऱ्या विधानसभा मतदारसंघात आधीच नोंदलेले असते. तात्पुरत्या याद्या प्रकाशित केल्या जात आहेत. BLO ना अशा माहितीची पडताळणी करण्याचे आणि आवश्यकतेनुसार पात्र मतदारांकडून फॉर्म ६ किंवा ८ घेण्याचे निर्देश देण्यात आले होते.”

खरे मतदार चुकीने गोळा न होऊ शकलेल्या श्रेणीत वर्गीकृत झाले असतील का?

असं विचारलं असता चोकलिंगम म्हणाले, काही अडचणी असू शकतात. उदाहरणार्थ, शहरी भागात काही लोक संध्याकाळी ७ किंवा ८ वाजल्यानंतरच घरी येतात. सामान्य कामकाजाच्या वेळेत उपलब्ध नसलेल्यांची संख्या मोठी आहे. आमचे BLO ९ वाजेपर्यंत काम करू शकत नाहीत. आमच्या अनेक BLO महिला आहेत, त्यामुळे आमच्याही मर्यादा आहेत. म्हणूनच मी हे स्पष्ट करतो आहे की ही प्रक्रियेचे विविध टप्पे आहेत. या टप्प्यांवर आम्ही संपूर्ण अचूकतेचा दावा करत नाही. ३१ ऑगस्टची यादी केवळ मसुदा आहे. एखाद्याला काहीतरी चुकीचे वाटत असल्यास, ते दुरुस्त केले जाऊ शकते. ही केवळ काही मोजक्या लोकांची जबाबदारी नाही. मतदारसंघातील प्रत्येक मतदाराने मसुद्याची पडताळणी आणि तपासणी करावी असंही आवाहन त्यांनी केलं आहे.