वाटूळ बौद्धवाडी रस्त्यावर भरदिवसा बिबट्याचे दर्शन; परिसरात भीतीचे वातावरण

राजापूर : राजापूर तालुक्यातील वाटूळ येथील बौद्धवाडी रस्त्यावर भरदिवसा एका रिक्षाचालकाला बिबट्याचे दर्शन झाल्याने परिसरात भीतीचे वातावरण निर्माण झाले आहे. अचानक रस्त्यावर बिबट्या दिसल्याने रिक्षाचालक काही काळ घाबरून गेला. सुदैवाने या घटनेत कोणतीही जीवितहानी झाली नाही.
या घटनेनंतर बौद्धवाडी परिसरातील नागरिकांमध्ये भीतीचे वातावरण पसरले असून, विशेषतः सकाळी आणि सायंकाळी या मार्गावरून ये-जा करणाऱ्या नागरिकांनी अधिक सतर्क राहावे, असे आवाहन करण्यात येत आहे.
स्थानिक ग्रामस्थांनी वन विभागाने तातडीने घटनास्थळी पाहणी करून बिबट्याच्या हालचालींवर लक्ष ठेवावे आणि नागरिकांच्या सुरक्षिततेच्या दृष्टीने आवश्यक उपाययोजना कराव्यात, अशी मागणी केली आहे.
तसेच नागरिकांनी शक्यतो निर्जन ठिकाणी एकट्याने जाणे टाळावे, रात्रीच्या वेळी अधिक दक्षता घ्यावी आणि बिबट्या आढळल्यास किंवा त्याच्या हालचाली दिसून आल्यास तत्काळ वन विभाग अथवा स्थानिक प्रशासनाला माहिती द्यावी, असे आवाहनही करण्यात आले आहे.
परिसरात बिबट्याचा वावर असल्याच्या या घटनेमुळे नागरिकांमध्ये चिंतेचे वातावरण असून, वन विभागाने तातडीने आवश्यक कार्यवाही करून नागरिकांना दिलासा द्यावा, अशी मागणी ग्रामस्थांकडून होत आहे.