पुणे हिंजवडीतील फ्लॅटमध्ये हायड्रोपोनिक गांजाची लागवड, 5 उच्चशिक्षित तरुण अटकेत, दोघं मुंबईतून ताब्यात!

पुणे येथील पिंपरी-चिंचवडच्या हद्दीत हिंजवडी फेज-एकमध्ये एका सोसायटीतील सदनिकेत हायड्रोपोनिक गांजाची लागवड करून उत्पादन घेतले जात असल्याचा धक्कादायक प्रकार खडकी पोलिसांनी उघडकीस आणला. या प्रकरणात पाच उच्चशिक्षित तरुणांना अटक करण्यात आली असून अमली पदार्थ तस्करीची साखळी उलगडताना पुण्यासह पिंपरी, मुंबई आणि गोवा येथे कारवाई करीत सुमारे साडेतीन कोटी रुपयांचे विविध प्रकारचे अमली पदार्थ जप्त करण्यात आले.

तुषार चेतन वर्मा (वय २१, सध्या रा. सूस), सुमीत संतोष डेडवाल (वय २५, रा. सांगवी), अक्षय सुखलाल महेर (वय २५, रा. हिंजवडी), मलय राजेश डेलीवाला (वय २८, रा. घाटकोपर, मुंबई) आणि स्वराज अनंत भोसले (वय २८, रा. कुर्ला, मुंबई) अशी अटक करण्यात आलेल्या आरोपींची नावे आहेत. यातील वर्मा हा नामांकित खासगी महाविद्यालयातून एमबीएचे शिक्षण घेत आहे. स्वराज भोसलेने अभियांत्रिकीची पदवी घेतलेली आहे. डेडवाल आणि महेर यांचे एमबीएचे शिक्षण झालेले आहे.

आरोपी तुषार वर्मा अमली पदार्थ विक्री करीत असल्याची माहिती मिळाल्यानंतर पोलिसांनी खडकी परिसरात सापळा रचून त्याला अटक केली. चौकशीत वर्माने सुमीत डेडवाल आणि अक्षय महेर यांच्यासह पिंपरीतील सदनिकेत हायड्रोपोनिक गांजाची लागवड केल्याची कबुली दिली. त्यानंतर पोलिसांनी पिंपरीत छापा टाकला. हिंजवडी येथे एका भाडेतत्त्वावरील सदनिकेत डेडवाल आणि महेर राहत होते. तेथे अत्याधुनिक पद्धतीने हायड्रोपोनिक गांजाची लागवड करण्यात येत असल्याची माहिती छाप्यादरम्यान उघड झाली. पोलिसांनी हायड्रोपोनिक गांजा तसेच लागवडीसाठी वापरण्यात येणारे साहित्य जप्त केले. या कारवाईनंतर मिळालेल्या माहितीनुसार पुणे, पिंपरीसह मुंबई आणि गोव्यातही छापे टाकण्यात आले.

या कारवाईत मेफेड्रोन, ओझीकुश (हायड्रोपोनिक गांजा), चरस, एलएसडी स्टॅम्पसह विविध प्रकारचे अमली पदार्थ जप्त करण्यात आले.

या प्रकरणातील मुख्य तस्कर मलय डेलीवाला आणि त्याचा साथीदार स्वराज भोसले यांना मुंबईतून ताब्यात घेतले. त्यांच्याकडून मिळालेल्या माहितीनुसार गोव्यात छापे टाकून सुमारे तीन कोटी ४५ लाख रुपयांचे अमली पदार्थ जप्त केले. या प्रकरणात अटक केलेल्या आरोपींच्या बँक खात्यातील सात लाख ८० हजार रुपयांची रक्कम गोठविण्यात आली.

शहरात अमली पदार्थांची तस्करी आणि महाविद्यालयीन तरुणांना लक्ष्य करून विक्री करणाऱ्यांविरुद्ध कठोर कारवाईचा आदेश होता. त्यानुसार पोलिस उपायुक्त सोमय मुंडे यांच्या मार्गदर्शनाखाली खडकी पोलिस ठाण्याचे वरिष्ठ निरीक्षक विक्रमसिंह कदम आणि उपनिरीक्षक दिग्विजय चौगले यांच्या पथकाने ही कारवाई केली.

गेल्या काही महिन्यांपासून आरोपी हिंजवडीत घरामध्ये गांजाची शेती करीत आहेत. तेथून अमली पदार्थाचे रॅकेट चालवित आहेत. ही बाब पुणे पोलिसांनी उघडकीस आणली. त्यामुळे पिंपरी-चिंचवड पोलिसांना या प्रकाराची किंचितही कल्पना कशी आली नाही, असा प्रश्न उपस्थित होत आहे.