गुहागरमध्ये उपमुख्यमंत्री एकनाथ शिंदे व पालकमंत्री उदय सामंत यांच्या उपस्थितीत आज पक्षप्रवेश
आबलोली : गुहागर तालुक्यातील वेळणेश्वर जिल्हा परिषद गटातील शिवसेना उद्धव बाळासाहेब ठाकरे पक्षातील एक माजी जिल्हा परिषद सदस्य, तीन माजी सभापती यांचा उपमुख्यमंत्री एकनाथ शिंदे व पालकमंत्री उदय सामंत यांच्या प्रमुख उपस्थितीत शिवसेना शिंदे गटात पक्षप्रवेश होणार असल्याची माहिती गुहागर विधानसभा मतदारसंघ समन्वयक विपुल कदम यांनी दिली.
गुहागर तालुक्यातील शृंगारतळी येथील शिवसेना संपर्क कार्यालयात आयोजित पत्रकार परिषदेत ते बोलत होते. हा पक्षप्रवेश गुहागर तालुक्यातील हेदवी हेदवतड येथील खारवी समाज भवन येथे २७ जुलै रोजी दुपारी ३ वाजता होणार आहे.
विपुल कदम यांनी सांगितले की, या पक्षप्रवेशांमध्ये शिवसेना उद्धव बाळासाहेब ठाकरे गटातील गुहागर तालुका महिला संघटक व माजी जिल्हा परिषद सदस्य नेत्रा ठाकूर, माजी गुहागर पंचायत समिती सभापती विलास वाघे, दत्ताराम निकम, पुनम पाष्टे तसेच या जिल्हा परिषद गटातील एकूण सहा सरपंच यांचा पक्षप्रवेश होणार आहे. पक्षात प्रवेश करणाऱ्या या सर्व पदाधिकाऱ्यांना नक्कीच शिवसेनेमध्ये मानाचे स्थान देण्यात येईल, हे सर्व कार्यकर्ते स्व इच्छेने येत आहेत त्यांचे राजकीय भवितव्यासाठी तसेच कार्यकर्त्यांचे बळ, ताकद वाढविण्यासाठी ते पक्षप्रवेश करत असल्याचे विपुल कदम म्हणाले.
जिल्हा नियोजनच्या माध्यमातून गुहागर तालुक्याला पुढील काळात जास्तीत जास्त निधी मिळेल, यासाठी आमचा प्रयत्न सुरू असल्याचे यावेळी तालुकाप्रमुख दीपक कनगुटकर यांनी सांगितले. सध्या पक्ष संघटना अधिक मजबूत करण्यासाठी आमचा प्रयत्न सुरू आहे. त्यासाठी पालकमंत्री यांच्या माध्यमातून जास्तीत जास्त निधी आणण्याचा आम्ही प्रयत्न करत असल्याचे कनगुटकर यांनी सांगितले.
या पत्रकार परिषदेला शिवसेना तालुकाप्रमुख दीपक कनगुटकर, युवा सेना जिल्हा समन्वयक अमरदीप परचुरे, गुहागर शहर प्रमुख निलेश मोरे, माजी नगरसेवक अमोल गोयथळे आदी मान्यवर उपस्थित होते.
