मनसे नेते वसंत मोरेंनी घेतली शरद पवार यांची भेट, म्हणाले, “मी राज मार्गावर.”

बारामती लोकसभा मतदारसंघात येणार्‍या विधानसभा मतदार संघनिहाय पुण्यातील मार्केटयार्ड येथील निसर्ग मंगल कार्यालयात राष्ट्रवादी काँग्रेस पक्ष- शरदचंद्र पवार पक्षाचे अध्यक्ष शरद पवार यांच्या अध्यक्षतेखाली बैठकीला सुरुवात झाली आहे. तर या बैठकीला खासदार सुप्रिया सुळे या देखील उपस्थित आहेत. त्याच दरम्यान मनसेचे नेते वसंत मोरे यांनी शरद पवार यांची भेट घेतली.त्या भेटीनंतर वसंत मोरे म्हणाले की, कात्रज डेअरीच्या मागील बाजूस असलेल्या जागेत पुणे महापालिका आयुक्तांमार्फत चुकीचे आरक्षण टाकण्यात आले आहे. त्या संदर्भात सह्यांची मोहीम हाती घेऊन नागरिकांमध्ये प्रबोधन केले जात आहे. तसेच उपमुख्यमंत्री अजित पवार यांच्याकडे देखील हा प्रश्न मांडला. पण काही मार्ग निघाला नाही. त्यानंतर बारामती लोकसभा मतदारसंघ हा कात्रज भागात येतो. त्यामुळे आज खासदार सुप्रिया सुळे यांना भेटण्यास आलो होतो. त्यावेळी शरद पवार यांची भेट झाली आणि त्यांना देखील निवेदन दिले. या प्रश्नावर लक्ष घालून मार्ग काढला जाईल, असे शरद पवार यांनी सांगितले आहे.तसेच ते पुढे म्हणाले की, यामधून कोणत्याही प्रकारचा राजकीय अर्थ काढू नये, माझ्या प्रभागातील नागरिकांच्या प्रश्नांसाठी शरद पवार आणि सुप्रिया सुळे यांची भेट घेतली आहे. अनेक नेते मंडळी विविध प्रश्नांसंदर्भात विरोधी पक्षातील नेत्यांची देखील भेट घेतात. त्यानुसार माझी आजची ही भेट असल्याचे त्यांनी सांगितले. तुम्ही बारामती की पुणे मतदार संघामधून इच्छुक आहात, त्या प्रश्नावर वसंत मोरे म्हणाले की, पुणे लोकसभा मतदारसंघातून इच्छुक असल्याचे त्यांनी सांगितले. शरद पवार आणि सुप्रिया सुळे यांची भेट घेतली असल्याने तुम्ही कोणत्या मार्गावर आहात, त्या प्रश्नावर उत्तर देताना, मी राज मार्गावर असल्याचे सांगत त्यांनी इतर प्रश्नांवर बोलणे टाळले.www.konkantoday.com