गोवळ-विल्ये पुलासाठी २५ कोटींचा निधी मंजूर! खा. नारायण राणे यांच्या पाठपुराव्याला यश; पुलाच्या कामाला प्रशासकीय मान्यता
राजापूर : तालुक्यातील गोवळ आणि विल्ये या दोन गावांना जोडण्यासाठी अर्जुना नदीवर मोठा पूल उभारण्याच्या अनेक वर्षांपासून प्रलंबित असलेल्या मागणीला अखेर यश आले आहे. या पुलाच्या बांधकामासाठी केंद्रीय मार्ग निधीअंतर्गत २५ कोटी रुपयांचा निधी मंजूर झाला असून, सार्वजनिक बांधकाम विभागाकडून या कामाला प्रशासकीय मान्यता देण्यात आली आहे. रत्नागिरी-सिंधुदुर्ग लोकसभा मतदारसंघाचे खासदार तथा राज्याचे माजी मुख्यमंत्री नारायण राणे यांनी यासाठी केलेल्या सातत्यपूर्ण पाठपुराव्याला यश आले आहे. त्यामुळे या परिसरातील ग्रामस्थांना मोठा दिलासा मिळणार आहे.
गोवळ आणि विल्ये या गावांदरम्यान अर्जुना नदीवर मोठा पूल उभारण्याची मागणी गेल्या अनेक वर्षांपासून होत होती. नदी ओलांडताना नागरिकांना येणाऱ्या अडचणी दूर होऊन दोन्ही गावांमधील दळणवळण अधिक सुलभ व्हावे, यासाठी स्थानिक ग्रामस्थांकडून सातत्याने पाठपुरावा केला जात होता. अखेर या मागणीची दखल घेत पुलाच्या बांधकामासाठी केंद्रीय मार्ग निधीअंतर्गत २५ कोटी रुपयांचा निधी मंजूर करण्यात आला आहे.
या प्रकल्पामध्ये पुलाच्या बांधकामासह संबंधित जोडरस्ते आणि आवश्यक पूरक कामांचाही समावेश आहे. प्रशासकीय मान्यता मिळाल्याने या महत्त्वपूर्ण प्रकल्पाच्या अंमलबजावणीच्या दिशेने एक महत्त्वाचे पाऊल पडले आहे. आता पुढील तांत्रिक प्रक्रिया आणि निविदाविषयक कार्यवाही पूर्ण झाल्यानंतर प्रत्यक्ष बांधकामाला सुरुवात होण्याचा मार्ग मोकळा होणार आहे.
दळणवळणाला मिळणार चालना
गोवळ-विल्ये दरम्यान अर्जुना नदीवर पूल उभारल्यामुळे परिसरातील ग्रामस्थांची ये-जा अधिक सुलभ होणार आहे. तसेच स्थानिक वाहतूक, शेतीविषयक कामे, शिक्षण, आरोग्यसेवा आणि दैनंदिन व्यवहारांसाठी नागरिकांना या पुलाचा मोठा फायदा होणार आहे. ग्रामीण भागातील दळणवळण व्यवस्था अधिक सक्षम होण्यासही या प्रकल्पामुळे मदत मिळणार आहे.
गेली कित्येक वर्षे प्रलंबित असलेल्या या पुलाच्या प्रश्नाला मार्गी लावण्यासाठी प्रयत्न केल्याबद्दल खासदार नारायण राणे यांचे स्थानिक ग्रामस्थांनी आभार मानले आहेत.
