अस्तानमध्ये बिबट्याच्या दहशतीने नागरिकांमध्ये भीती

खेड : तालुक्यातील अस्तान गावातील मेढेकरवाडी परिसरात बिबट्याचा वावर वाढल्याने नागरिकांमध्ये भीतीचे वातावरण निर्माण झाले आहे. दामू पवार यांच्या बकऱ्यांच्या गोठ्यात घुसून बिबट्याने बोकडावर हल्ला केल्याची घटना घडली. त्यानंतर पवार यांच्या घराच्या अंगणातील कुत्र्याला बिबट्याने उचलून नेल्याने परिसरातील नागरिकांमध्ये चिंता वाढली आहे.
दामू पवार यांच्या घराजवळच जिल्हा परिषद शाळा क्रमांक २, अस्तान मावळतवाडी ही शाळा असल्याने विद्यार्थ्यांच्या सुरक्षिततेचा प्रश्नही निर्माण झाला आहे. या पार्श्वभूमीवर वनविभागाच्या वतीने शाळेत विद्यार्थी, शिक्षक व ग्रामस्थांना बिबट्यापासून बचावाबाबत मार्गदर्शन करण्यात आले.
यावेळी वनरक्षक परमेश्वर डोईफोडे व वनरक्षक वैभव काटेखाये यांनी बिबट्याचा वावर आढळल्यास घाबरून न जाता कोणती खबरदारी घ्यावी, रात्रीच्या वेळी घराबाहेर पडताना कोणती काळजी घ्यावी, तसेच लहान मुले व पाळीव प्राण्यांच्या सुरक्षेसाठी कोणत्या उपाययोजना कराव्यात, याबाबत माहिती दिली.
बिबट्याच्या हालचालींबाबत नागरिकांनी सतर्क राहावे. बिबट्या दिसल्यास त्याच्या जवळ जाण्याचा किंवा त्याला हुसकावून लावण्याचा प्रयत्न न करता तातडीने वनविभागाला माहिती द्यावी, असे आवाहन वनविभागाकडून करण्यात आले.
या कार्यक्रमास शाळेतील विद्यार्थी, शिक्षिका प्रियांका पाणथवणे तसेच ग्रामस्थ प्रकाश मोरे, मनोहर साळुंखे, श्रीधर साळुंखे, दिलीप मोरे, दर्शना पवार, दामू पवार, निशा पवार, नितीन पवार, मनिषा पवार, कुमार साळुंखे, वासंती पवार, संदिप पवार, संजना पवार, संज्या पवार, अनिल तांबे यांच्यासह ग्रामस्थ उपस्थित होते.
दरम्यान, बिबट्याच्या वावरामुळे निर्माण झालेल्या परिस्थितीवर वनविभागाने सातत्याने लक्ष ठेवून नागरिकांच्या सुरक्षिततेसाठी आवश्यक उपाययोजना कराव्यात, अशी अपेक्षा ग्रामस्थ विकास मोरे यांनी व्यक्त केली.