शिकार करण्याच्या उद्देशाने फिरणारे दोघेजण देवरूख पोलिसांच्या ताब्यात

संगमेश्वर : तालुक्यातील देवरूख पोलिसांनी शिकारीच्या उद्देशाने बेकायदा शस्त्र बाळगणाऱ्यांविरोधात मोठी कारवाई केली आहे. पांगरी-घोडवली सीमेवर बुधवारी (१ एप्रिल) पहाटे गस्त घालत असताना पोलिसांनी दोन संशयित तरुणांना ताब्यात घेतले. त्यांच्याकडून विनापरवाना बंदूक आणि ७ जिवंत काडतुसे जप्त करण्यात आली आहे.

मिळालेल्या माहितीनुसार, देवरूखचे पोलीस निरीक्षक उदय झावरे यांच्या मार्गदर्शनाखाली पोलीस पथक बुधवारी पहाटे परिसरात गस्त घालत होते. यावेळी सचिन कामेरकर, सचिन पवार आणि अभिषेक वेळवणकर यांना पांगरी- घोडवलीच्या सीमेवर एका मोटारसायकलवरून दोन तरुण संशयास्पद रित्या फिरताना आढळले. पोलिसांनी त्यांना थांबवून चौकशी केली असता त्यांच्याकडे विनापरवाना बंदूक सापडली. वन्य प्राण्यांची शिकार करण्याच्या उद्देशाने हे दोघे फिरत असल्याचे तपासात समोर आली आहे.

या प्रकरणी पोलिसांनी सूरज आगरे (रा. आग्रेवाडी, तुळसणी) आणि संदीप कातकर (रा. कातकरवाडी, तुळसणी) यांच्यावर गुन्हा दाखल केला आहे. त्यांच्याकडून एक बंदूक, ७ जिवंत काडतुसे आणि गुन्ह्यात वापरलेली मोटार सायकल जप्त करण्यात आली आहे.
या कारवाईबद्दल लांजाचे विभागीय पोलीस अधिकारी सुरेश कदम यांनी देवरूख पोलिसांचे कौतुक केले आहे. ही विनापरवाना बंदूक आरोपींकडे कुठून आली आणि यामध्ये आणखी कोणाचे धागेदोरे आहेत का, याचा अधिक तपास पोलीस करत आहेत.