दिनांक १० नोव्हेंबर २०२५ पासून रत्नागिरी येथे ६४ व्या हौशी मराठी राज्य नाटय स्पर्धेला सुरुवात…मा. जिल्हाधिकारी श्री. मनुज जिंदाल यांच्या हस्ते उद्घाटन
महाराष्ट्र शासनाच्या सांस्कृतिक कार्य संचालनालयामार्फत आयोजित ६४ वी हौशी राज्य नाट्य स्पर्धा प्राथमिक फेरी रत्नागिरी येथील स्वातंत्र्यवीर विनायक दामोदर सावरकर नाट्यगृह येथे सुरू होत आहे.
दिनांक १० नोव्हेंबर ते ९ डिसेंबरच्या दरम्यान रोज संध्याकाळी ७ वाजता नाटकाचे प्रयोग सादर होणार आहेत.
दिनांक १० नोव्हेंबर २०२५ रोजी सायंकाळी ७ वाजता रत्नागिरी जिल्ह्याचे मा. जिल्हाधिकारी श्री. मनुज जिंदाल यांच्या हस्ते तर अखिल भारतीय मराठी नाट्य परिषद शाखा रत्नागिरीचे कार्यवाह श्री. वामन कदम, बालरंगभूमी परिषद शाखा रत्नागिरी कार्यवाह सौ. सीमा कदम, ज्येष्ठ रंगकर्मी श्री. दत्ता बोरकर आणि रंगभूमी प्रयोग परिनिरीक्षण मंडळाचे सदस्य श्री. राजेश गोसावी यांच्या प्रमुख उपस्थितीत या स्पर्धेचा उद्घाटन समारंभ पार पडणार आहे.
सांस्कृतिक कार्य विभागाचे सचिव डॉ. किरण कुलकर्णी यांच्या मार्गदर्शनाखाली राज्य नाट्य स्पर्धा पार पडणार असल्याचे सांस्कृतिक कार्य संचालक श्री.विभीषण चवरे यांनी नमूद केलेले आहे.
या स्पर्धेमध्ये एकूण १८ संघांचा सहभाग असून उद्घाटनानंतर दर्यावर्दी प्रतिष्ठान निर्मित अकल्पित नाटकाने स्पर्धेची सुरुवात होणार आहे. राज्यनाट्य स्पर्धेतील सर्व नाटकांना जास्तीत जास्त प्रेक्षकांनी उपस्थित राहावे आणि हौशी रंगकर्मींचा उत्साह वाढवावा असे आवाहन संचालक बिभीषण चवरे यांनी केलेले आहे.
