चिपळूणमध्ये दोन दिवसांची अभिनय कार्यशाळा

अभिनयाची आवड असलेल्या तरुणांना सिनेसृष्टीकडे वाटचाल करण्याची सुवर्णसंधी उपलब्ध झाली आहे. अखिल भारतीय मराठी नाट्य परिषद, शाखा चिपळूण यांच्या वतीने दोन दिवसीय अभिनय कार्यशाळेचे आयोजन करण्यात आले असून, ही कार्यशाळा रोहन मापुस्कर यांच्या प्रमुख मार्गदर्शनाखाली पार पडणार आहे. मुंबई आणि पुण्यात अभूतपूर्व यश मिळवल्यानंतर कोकणात प्रथमच ही कार्यशाळा आयोजित होत आहे, अशी माहिती अखिल भारतीय मराठी नाट्य परिषद, शाखा चिपळूणचे अध्यक्ष डॉ. प्रशांत पटवर्धन यांनी दिली.

कार्यशाळा १ व २ नोव्हेंबर २०२५ रोजी दुपारी २ ते सायं. ८ या वेळेत इंदिरा गांधी सांस्कृतिक केंद्र, चिपळूण येथे होणार आहे. या कार्यशाळेचे उद्दिष्ट म्हणजे अभिनय क्षेत्रात प्रवेश करू इच्छिणाऱ्या युवकांना कॅमेरा समोर आत्मविश्वासाने उभे राहण्यासाठी प्रशिक्षण देणे आणि ऑडिशन प्रक्रियेची सखोल माहिती पुरवणे होय.

कार्यशाळेत कॅमेरा फेसिंग तंत्रज्ञान, ऑडीशन मार्गदर्शन, अॅक्टींग इम्प्रोवायजेशन तसेच भरपूर प्रात्यक्षिक सत्रांचा समावेश आहे. वयोमर्यादा १५ वर्षांपासून वर ठेवण्यात आली असून, सहभागासाठी फी ₹१००० आहे. आयोजकांनी सांगितले की, जागा मर्यादित असल्याने इच्छुकांनी लवकर नोंदणी करावी.

रोहन मापुस्कर हे ‘थ्री इडियट्स’, ‘मुन्नाभाई एमबीबीएस’ या लोकप्रिय हिंदी चित्रपटांमध्ये सहाय्यक दिग्दर्शक म्हणून कार्यरत होते. त्यांनी ‘एप्रिल-मे ९९’ चित्रपटाचे दिग्दर्शन केले आहे. तसेच ‘झोंबिवली’, ‘स्माईल प्लीज’, ‘वाळवी’, ‘वेड’, ‘ठाकरे’, ‘सचिन’, ‘आत्मपॅम्प्लेट’, ‘उनाड’, ‘व्हेंटिलेटर’, ‘हिरकणी’, ‘रूपनगर के चिते’ अशा अनेक मराठी चित्रपटांचे कास्टिंग डिरेक्टर म्हणून काम केले आहे.

त्यांच्या मार्गदर्शनाखाली अभिनय शिकण्याची आणि सिनेसृष्टीचा प्रत्यक्ष अनुभव घेण्याची संधी कोकणातील नवोदित कलावंतांना मिळणार आहे. कार्यशाळेबाबत अधिक माहितीसाठी संपर्क साधावा: योगेश बांडागळे – ९९२३४२८८३८, ॲड. विभावरी राजपूत – ७७९६७२९५८७.

डॉ. प्रशांत पटवर्धन म्हणाले, “या उपक्रमातून कोकणातील अभिनय क्षेत्रातील नवोदितांना योग्य दिशा मिळेल. सुप्त कलागुणांना वाव मिळून सिनेसृष्टीकडे पहिले पाऊल टाकण्यास मदत होईल.”