रत्नागिरीच्या समुद्रात युवाशौर्याचा जागर: एनसीसी कॅडेट्सच्या २५० किमी साहसी नौकानयन मोहिमेस शानदार प्रारंभ

रत्नागिरी, दि. २२ ): अथांग अरबी समुद्राच्या उसळणाऱ्या लाटा, शिस्तबद्ध संचलन आणि छत्रपती शिवाजी महाराजांच्या मराठा आरमाराचा देदीप्यमान वारसा… अशा अत्यंत प्रेरणादायी आणि उत्साही वातावरणात ‘२ महाराष्ट्र नेवल युनिट एनसीसी, रत्नागिरी’ च्यावतीने राष्ट्रीय स्तरावरील ‘मेन्यू २७’ (MENU 27) या साहसी खुल्या सागरी नौकानयन मोहिमेचा आज अल्ट्राटेक जेटी येथून दिमाखात शुभारंभ झाला. कोल्हापूर एनसीसी मुख्यालयाचे ग्रुप कमांडर ब्रिगेडियर आर. के. पैठणकर आणि २ महाराष्ट्र नवल युनिटचे कमांडिंग ऑफिसर कमांडर रामबल्लूब दीक्षित यांनी हिरवा झेंडा दाखवून या मोहिमेची औपचारिक सुरुवात केली.

याप्रसंगी मार्गदर्शन करताना ब्रिगेडियर आर. के. पैठणकर म्हणाले, “ही मोहीम केवळ एका स्पर्धेपुरती मर्यादित नसून तरुणाईमध्ये नेतृत्व गुण, धाडस आणि अढळ शिस्त निर्माण करणारी जीवनशाळा आहे. खुल्या समुद्रातील उसळत्या लाटांशी सामना करताना हे कॅडेट्स केवळ कणखर बनणार नाहीत, तर त्यांना कोकणच्या समृद्ध व पराक्रमी सागरी इतिहासाची प्रत्यक्ष अनुभूतीही येईल.”
कमांडिंग ऑफिसर कमांडर रामांजुल दीक्षित यांनी कॅडेट्सच्या सामाजिक बांधिलकीवर भर देत सांगितले, “आमचे शूर कॅडेट्स केवळ समुद्रावर स्वार होणार नाहीत, तर किनाऱ्यावरील गावांमध्ये जाऊन तटीय सुरक्षा आणि सागरी स्वच्छतेचा जनजागृतीपर संदेशही तळागाळापर्यंत पोहोचवतील.”
मोहिमेची ठळक वैशिष्ट्ये
*६० कॅडेट्स, २५ मुलींचे शौर्य: संपूर्ण महाराष्ट्रातून कसून निवडलेल्या ६० गुणवंत एनसीसी कॅडेट्सचा यात सहभाग असून यामध्ये २५ मुली आणि ३५ मुलांचा समावेश आहे. मोहिमेपूर्वी ६ ते १५ ऑक्टोबर दरम्यान पार पडलेल्या १० दिवसांच्या विशेष पूर्वतयारी शिबिरात (CATC-327) या कॅडेट्सनी नेव्हिगेशन, बोट पुलिंग, रिगिंग आणि बचावकार्याचे खडतर प्रशिक्षण पूर्ण केले आहे.
*२५० किमीचा थरारक प्रवास: कॅडेट्स २७ फूट लांबीच्या पारंपरिक ‘डीके व्हेलर’ (DK Whaler) नौकांमधून रत्नागिरी ते पलशेत आणि परतीचा असा तब्बल २५० किलोमीटरचा प्रवास पूर्ण करतील. या प्रवासात तिवरी, जयगड, बोरिया आणि पलशेत येथे या नौकांचे मुक्काम असतील.
*मराठा आरमाराला वंदन: “कोकण ज्ञान तरंग” ही मूळ संकल्पना आणि “जाणाऱ्या वाटा, प्रगतीच्या वाटा” या ध्येयवाक्यासह ही मोहीम छत्रपती शिवाजी महाराजांच्या ऐतिहासिक सागरी सामर्थ्याला मानवंदना देत आहे.

• सामाजिक प्रबोधनाचा वसा: “ज्ञान आणि प्रगतीची वाट: आदर्श कोकणाच्या दिशेने नौकानयन” या उपक्रमांतर्गत मुक्कामाच्या गावांमध्ये कॅडेट्स पथनाट्ये, रॅली आणि व्याख्यानांच्या माध्यमातून प्रदूषणमुक्ती व तटीय सुरक्षेबाबत स्थानिक नागरिकांमध्ये जागृती निर्माण करतील.
• पंतप्रधान रोलिंग ट्रॉफीचा मान: एनसीसीच्या राष्ट्रीय स्तरावरील मानाच्या ‘मोस्ट एंटरप्रायजिंग नेवल युनिट’ (MENU 27) या पंतप्रधान रोलिंग ट्रॉफी स्पर्धेचा हा एक महत्त्वाचा टप्पा असून, या मोहिमेच्या यशामुळे महाराष्ट्र एनसीसी डायरेक्टरेटला प्रतिष्ठेचे गुण प्राप्त होणार आहेत.
  चोख सुरक्षा व्यवस्था
  सागरी सुरक्षेच्या दृष्टीने मोहिमेसोबत ३ विशेष एस्कॉर्ट व हाय-स्पीड रेस्क्यू नौका तैनात करण्यात आल्या आहेत. या मोहिमेच्या सुरळीत आयोजनासाठी वेस्टर्न नवल कमांड, कोस्ट गार्ड स्टेशन, एमआरएमसी मुंबई, प्रादेशिक बंदर कार्यालय, सीमाशुल्क (कस्टम्स) विभाग आणि जिल्हा प्रशासनाने संयुक्तपणे भक्कम सहकार्य पुरवले आहे. समुद्राच्या लाटांवर स्वार होऊन निघालेल्या या तरुण नौदल कॅडेट्सचा उत्साह संपूर्ण कोकण किनारपट्टीवर कौतुकाचा विषय ठरत आहे.