जिद्द, चिकाटी आणि संघर्षाची प्रेरणादायी कहाणी – उमेर अशपाक सोलकर

उमेर अशपाक सोलकर (वय १६ वर्षे), रा. साखरीनाटे, ता. राजापूर, जि. रत्नागिरी हा जन्मतः अस्थिव्यंग दिव्यांग आहे. त्याला कधीच चालता आले नाही. मात्र, आपल्या जिद्द, चिकाटी आणि प्रबळ इच्छाशक्तीच्या जोरावर त्याने इयत्ता १० वीच्या परीक्षेत ६०% गुण मिळवून उल्लेखनीय यश संपादन केले आहे.

उमेरचे वडील श्री. अशपाक सोलकर हे रोजंदारीवर माशांच्या जाळ्या विणण्याचे काम करून कुटुंबाचा उदरनिर्वाह करतात. आई सौ. मेहरून सोलकर या गृहिणी असून उमेरची संपूर्ण जबाबदारी आणि सेवा त्या एकट्याच सांभाळतात. मोठी बहीण विवाहित आहे, तर भाऊ हसन मोलमजुरी करून कुटुंबाला हातभार लावतो.

उमेर आज १६ वर्षांचा असला तरी त्याचे वजन केवळ १४ किलो आहे. तो स्वतःची कोणतीही दैनंदिन कामे करू शकत नाही. प्रत्येक गोष्टीसाठी तो आईवरच अवलंबून आहे. लहानपणापासून त्याची आई त्याला रोज उचलून शाळेत घेऊन जात असे आणि शाळा सुटल्यानंतर पुन्हा उचलून घरी आणत असे. त्याची शारीरिक ठेवण इतकी लहान होती की लहान व्हीलचेअरमध्येही तो व्यवस्थित बसू शकत नव्हता.

इयत्ता ९ वीमध्ये असताना आई त्याला शाळेत घेऊन जात असताना दोघेही पडले. या अपघातात उमेरचा एक पाय दोन ठिकाणी मोडला. त्याच्यावर शस्त्रक्रिया करून पायात रॉड बसवण्यात आला. त्यानंतर त्याला शाळेत नेण्यासाठी दोन व्यक्तींची मदत घ्यावी लागे आणि स्ट्रेचरवरून शाळेत न्यावे लागे.

इयत्ता १० वीमध्ये त्याच्या प्रकृतीचा विचार करून शिक्षकांनी त्याला घरी बसून अभ्यास करण्याचा सल्ला दिला. एक शिक्षक दररोज त्याच्या घरी जाऊन त्याला शिकवत होते. दहावीची परीक्षाही त्याने स्ट्रेचरवरून परीक्षा केंद्रात जाऊन रायटरच्या मदतीने दिली. परीक्षा केंद्रात त्याला स्वतंत्र खोली आणि अतिरिक्त २० मिनिटांचा वेळ देण्यात आला होता.

अनेक संकटांवर मात करत उमेरने १० वीमध्ये ६०% गुण मिळवले. त्याच्या या यशाबद्दल सर्व स्तरांतून त्याचे मनापासून कौतुक होत आहे. हे यश केवळ त्याचे नसून त्याच्या आई-वडिलांच्या त्यागाचे, शिक्षकांच्या मार्गदर्शनाचे आणि त्याच्या अदम्य इच्छाशक्तीचे प्रतीक आहे.

आता उमेरची इच्छा पुढील शिक्षण घेऊन डिझाईन क्षेत्रात करिअर करण्याची आहे. डॉक्टरांच्या सल्ल्यानुसार त्याचे शिक्षण सुरू ठेवण्यात येणार आहे. मात्र, त्यासाठी त्याला मानसिक, शैक्षणिक आणि आर्थिक मदतीची नितांत गरज आहे. विशेषतः ऑनलाइन शिक्षण आणि डिझाईनचे शिक्षण घेण्यासाठी लॅपटॉपची अत्यंत आवश्यकता आहे.

आपल्या छोट्याशा मदतीमुळे एका जिद्दी विद्यार्थ्याचे शिक्षण सुरू राहू शकते आणि त्याच्या स्वप्नांना नवी दिशा मिळू शकते.

उमेरच्या शिक्षणासाठी किंवा लॅपटॉपसाठी आर्थिक मदत करू इच्छिणाऱ्या दात्यांनी कृपया त्याच्या पालकांशी खालील क्रमांकावर संपर्क साधावा.

📞 संपर्क : 9272375117

चला, एका जिद्दी विद्यार्थ्याच्या स्वप्नांना बळ देऊया. आपली छोटीशी मदत त्याचे भविष्य उज्ज्वल करू शकते. कृपया ही माहिती जास्तीत जास्त शेअर करा. 🙏