खेडमध्ये दुकानफोडी; दोन संशयित महिला सीसीटीव्हीत कैद
व्यापारी संकुलातील ‘संकेत इलेक्ट्रॉनिक’मध्ये चोरी; सीसीटीव्ही फुटेजच्या आधारे पोलिसांचा तपास
खेड :शहरातील भाऊसाहेब पाटणे व्यापारी संकुलातील ‘संकेत इलेक्ट्रॉनिक’ या दुकानात चोरी झाल्याची घटना उघडकीस आली आहे. चोरीच्या घटनेपूर्वी दुकान परिसरात संशयास्पदरीत्या वावरणाऱ्या दोन महिला सीसीटीव्ही कॅमेऱ्यात कैद झाल्या असून, या फुटेजच्या आधारे पोलिसांनी तपासाला सुरुवात केली आहे.
१७ ऑगस्ट रोजी पहाटे ५ ते ५.३० वाजण्याच्या सुमारास दुकानात चोरी झाल्याचे समोर आले. घटनेनंतर परिसरातील सीसीटीव्ही फुटेज तपासण्यात आले असता दोन महिला संशयास्पद हालचाली करताना दिसून आल्या. त्यामुळे या महिलांचा चोरीशी काही संबंध आहे का, याचा तपास पोलिसांकडून केला जात आहे.
सीसीटीव्ही फुटेजमुळे पोलिसांच्या तपासाला महत्त्वाचा धागा मिळाला असून, संशयित महिलांची ओळख पटविण्याचे प्रयत्न सुरू आहेत. दरम्यान, दुकानातून नेमका किती मुद्देमाल किंवा रोकड चोरीला गेली, याबाबतची अधिकृत माहिती अद्याप स्पष्ट झालेली नाही.
तपासातून चोरीमागील नेमके कारण आणि संशयितांची भूमिका स्पष्ट होणार आहे. शहरातील व्यापाऱ्यांनी दुकानांमध्ये सीसीटीव्ही यंत्रणा कार्यरत ठेवावी तसेच परिसरात संशयास्पद हालचाली आढळल्यास तत्काळ पोलिसांना माहिती द्यावी, असे आवाहन करण्यात आले आहे.
