पावसाळ्यातील सर्वात मोठी भरती आज; समुद्रात ४.६७ मीटर उंचीच्या लाटा उसळणार; जाणून घ्या किती वाजता आहे आज भरती!

मुंबई : समुद्रात आज या पावसाळ्यातील सर्वात मोठी भरती उसळणार आहे. यावेळी समुद्रात ४.६७ मीटर उंचीच्या लाटा उसळणार आहेत. भरतीच्या वेळी समुद्रकिनारी जाणे टाळावे, तसेच यासंदर्भात मुंबई महापालिका प्रशासनाने जारी केलेल्या सूचनांचे काटेकोरपणे पालन करावे, असे आवाहन महापालिका प्रशासनाने केले आहे. समुद्राला गुरुवार, २४ जुलैपासून सलग चार दिवस मोठी भरती येणार असल्याचे मुंबई महानगरपालिका प्रशासनाने जाहीर केले आहे. या चार दिवसांपैकी सर्वात मोठी भरती शनिवार, २६ जुलै रोजी दुपारी येणार आहे. यंदाच्या पावसाळ्यातील ही सर्वात मोठी भरती आहे. रविवार, २७ जुलै रोजीही समुद्राला मोठी भरती येणार असून यावेळी ४.६० मीटर उंचीच्या लाटा उसळतील.

मुंबई महापालिकेने पावसाळ्यासाठी भरती – ओहोटीचे वेळापत्रक जाहीर केले आहे. भरती काळात नागरिकांनी समुद्रकिनारी जाऊ नये, तसेच या अनुषंगाने प्रशासनाकडून वेळोवेळी देण्यात येणाऱ्या सूचनांचे काटेकोरपणे पालन करावे, असे आवाहन मुंबई महानगरपालिकेने केले आहे. तसेच हवामान विभागाने शनिवारसाठी ऑरेंज अलर्ट दिला असून मुसळधार ते अतिमुसळधार पावसाचा इशारा दिला आहे. त्यामुळे नागरिकांनी काळजी घ्यावी,, असे आवाहन महापालिका प्रशासनाने केले आहे.

पावसाळ्यात भरतीच्या वेळी समुद्रात बुडून, वाहून जीव गेल्याच्या दुर्घटना घडत असल्यामुळे ही सूचना देण्यात आली आहे. मुंबईत गिरगाव, दादर, जुहू, माहीम, वर्सोवा, आक्सा, गोराई अशा सात मोठ्या चौपाट्या आहेत. तसेच मरिन ड्राईव्ह, वरळी, वांद्रे येथे समुद्री पदपथ आणि बसण्यासाठी कट्टा आहे. या ठिकाणी पावसाळ्यात नागरिक मोठ्या प्रमाणावर लाटांचा आनंद घेण्यासाठी येत असतात.

अतिवृष्टी झाल्यास मुंबई तुंबणार…

चारही बाजूने समुद्राने वेढलेल्या मुंबईला पावसाळ्यात मोठ्या भरतीचाही धोका असतो. पावसाळ्यात समुद्र खवळलेला असला तरी साडेचार मीटरपेक्षा उंच लाटा उसळणार असतील आणि त्याचवेळी मुसळधार पाऊस कोसळल्यास पाण्याचा निचरा नैसर्गिक पद्धतीने होत नाही. त्याउलट समुद्राच्या भरतीचे पाणी पर्जन्य जलवाहिन्यांमधून शहरात शिरते. त्यामुळे सखल भागात पाणी साचते. भरती – ओहोटीच्या वेळा या मुंबईकरांसाठी अतिशय महत्त्वाच्या आहेत. भरती आणि अतिवृष्टी दोन्ही एकाच वेळी आले तर मुंबईत शंभर टक्के पाणी तुंबते. त्यामुळे मुंबईकरांना पावसाचा अंदाज घेऊनच आपल्या कामाचे नियोजन करावे लागणार आहे. शनिवारी दुपारी १ वाजून २० मिनिटांनी भरतीची वेळ आहे.

दोन दिवस मोठ्या भरतीचे

शनिवार, २६.०७.२०२५ दुपारी ०१.२० वाजता – लाटांची उंची (मीटर) – ४.६७
रविवार, २७.०७.२०२५ दुपारी ०१.५६ वाजता – लाटांची उंची (मीटर) – ४.६०