डुकराच्या शिकारीसाठी झाडली होती गोळी,गोवळकोटमधील गोळीबार प्रकरण : दोघांना अटक
काही दिवसांपूर्वी शहरातील गोवळकोट रस्त्यावर घडलेले गोळीबार प्रकरण अखेर उलगले असून, याप्रकरणी चिपळूण पोलिसांनी विशाल विजय पवार (३६, रा. पेठमाप) आणि नितिन धोंडू होळकर (३०, रा. कोंढे) या दोन संशयितांना अटक केली आहे. डुकराच्या शिकारीसाठी झाडलेली गोळी चुकून हायलाईफ इमारतीत घुसल्याचे तपासात निष्पन्न झाले असून, यामध्ये विनापरवाना बंदुकीचा वापर झाल्याचेही उघडकीस आले आहे. दोघांना न्यायालयीन कोठडी सुनावण्यात आली आहे.
पोलिसांनी नितिन होळकरकडे असलेली विनापरवाना सिंगल बोअर बंदूक जप्त केली आहे. ही घटना २९ जून रोजी सकाळी सुमारे ११ वाजता घडली. गोवळकोट रस्त्यावरील हायलाईफ इमारतीच्या पहिल्या मजल्यावर राहणाऱ्या अशरफ तांबे यांच्या स्वयंपाकघराच्या खिडकीतून गोळी घुसल्याने परिसरात एकच खळबळ उडाली होती. खिडकीची काच फोडत गोळी थेट घरात घुसल्याने काही काळ तणावाचे आणि भीतीचे वातावरण निर्माण झाले होते.
या घटनेनंतर चिपळूण पोलिस ठाण्यात अज्ञाताविरोधात गुन्हा दाखल केला होता. तपासादरम्यान गोपनीय माहितीच्या आधारे विशाल पवार आणि नितिन होळकर यांना ताब्यात घेण्यात आले. चौकशीत त्यांनी डुकराच्या शिकारीसाठी गोळी झाडल्याची कबुली दिली आहे. विशेष म्हणजे विशाल पवार यांची शेती हायलाईफ इमारतीच्या शेजारी आहे. नितिन होळकरने झाडलेली गोळी चुकून त्या दिशेने गेली आणि थेट अशरफ तांबे यांच्या घरात घुसली.
या प्रकारामुळे परिसरातील नागरिकांमध्ये भीतीचे वातावरण निर्माण झाले असून, भविष्यात असे प्रकार टाळण्यासाठी कठोर कारवाईची मागणी होत आहे. या संपूर्ण तपास आणि कारवाईसाठी पोलिस निरीक्षक फुलचंद मेंगडे यांच्या मार्गदर्शनाखाली गुन्हे प्रकटीकरण पथकाचे पोलिस उपनिरीक्षक ओम आघाव, पोलिस हेडकॉन्स्टेबल वृशाल शेटकर, संदीप माणके, प्रितेश शिंदे, रोशन पवार आणि रूपेश जोगी यांनी मोलाची भूमिका बजावली.
