
लाईट इन्व्हर्टरचे काम करत असतानाच शॉक लागल्याने दापोली लाडघर येथील हॉटेल व्यवसायिकाचा दुर्दैवी मृत्यू
पावसाळ्यात विजेचे यंत्रणा हाताळताना काळजी घेण्याचे आवाहन महावितरण करीत असते मात्र तरी देखील अनेक दुर्घटना घडत असतात. अशीच एक दुर्दैवी घटना रत्नागिरी जिल्ह्यातील दापोली तालुक्यात लाडघर येथे घडली आहे. लाईट इन्व्हर्टरचे काम करत असतानाच शॉक लागल्याने ६२ वर्षीय सुनील होलम या व्यवसायिकाचा दुर्दैवी मृत्यू झाला आहे. लाडघर येथील सुखसागर हॉटेलचे मालक सुनील होलम यांच्यासोबत ही घटना घडली. काल सायंकाळच्या सुमारास ही घटना घडली
लाडघर येथील औदुंबरवाडी येथे राहणारे ग्रामस्थ सुनील होलम यांचा गेली अनेक वर्ष पर्यटनाचा व्यवसाय आहे. हॉटेल सुखसागरचे ते मालक आहेत. गेले सुमारे वीस वर्षे ते हा व्यवसाय करत आहेत. होलम कुटुंबीयांचा शेती, बागायती, पर्यटन हा व्यवसाय आहे. मंगळवारी दुपारनंतर घरातच काही काम करत असताना त्यांना अचानक इन्व्हर्टरच्या विजेचा शॉक लागला. यानंतर ते अस्वस्थ झाले त्यांना तात्काळ रिक्षातून दापोली येथे रुग्णालयात दाखल करण्यात आले. मात्र वाटेतच त्यांचा मृत्यू झाला