झोपेत, सकाळी उठल्यावर हात-पाय सुन्न पडतात? ‘ही’ लक्षणे दिसल्यास सावधान! वेदना व सुन्नपणा दूर करण्यासाठी करा हे उपाय, मिळेल लगेच आराम!
Numb Hands While Sleeping : झोपेत असताना तुमचे हात अचानक सुन्न होतात आणि बोटांना मुंग्या येऊ लागतात, असे तुमच्यासोबत घडते का? लोक अनेकदा हात हलवून किंवा झोपण्याची स्थिती बदलून पुन्हा झोपी जातात.
अधूनमधून असे होणे सामान्य आहे; परंतु जर ही समस्या वारंवार उद्भवत असेल, तर त्याकडे दुर्लक्ष करू नये. असा त्रास नसांवरील दाबामुळे किंवा गंभीर आरोग्य समस्यांमुळेदेखील होऊ शकतो.
चुकीच्या स्थितीत झोपणे
गाझियाबाद येथील यशोदा हॉस्पिटलचे डॉ. एस. के. अग्रवाल यांच्या मते, हाताला मुंग्या येण्याचे सर्वांत सामान्य कारण म्हणजे झोपण्याची चुकीची पद्धत. डोके काखेत ठेवून किंवा हात शरीराखाली दाबून झोपल्याने नसांवर दाब येतो. बराच वेळ एकाच स्थितीत राहिल्याने हाताला मुंग्या येऊ शकतात किंवा हाताला बधिरता येऊ शकते. अशा परिस्थितीत झोपण्याची स्थिती बदलल्याने आणि हाताला आराम दिल्याने ही समस्या कमी होण्यास मदत होऊ शकते.
तुमच्या मनगटातील शिरांची काळजी घ्या
मनगटातील नसांवर दाब पडल्याने कार्पल टनेल सिंड्रोम नावाची स्थिती उद्भवू शकते. त्यामध्ये विशेषतः अंगठा, तर्जनी आणि मधल्या बोटात बधिरता, मुंग्या येणे किंवा वेदना जाणवतात. कधी कधी ही अस्वस्थता रात्रीच्या वेळी वाढते आणि तुम्हाला झोपेतून जागे करते. असे वारंवार होत असल्यास, डॉक्टरांचा सल्ला घेणे महत्त्वाचे आहे.
मानेच्या नसांवर दाब पडणे हेदेखील एक कारण
मानेच्या हाडांमधील किंवा चकत्यांमधील समस्यांमुळेदेखील हातांना बधिरता येऊ शकते. जेव्हा मानेतून निघणाऱ्या मज्जातंतूंवर दाब येतो, तेव्हा हातांमध्ये वेदना होणे, मुंग्या येणे किंवा अशक्तपणा जाणवू शकतो. जर हातांच्या बधिरतेसोबत मानेचे दुखणे असेल, तर त्याची तपासणी करून घेतली पाहिजे. तसेच, कोपर बराच वेळ वाकवून ठेवल्याने किंवा त्यावर शरीराचा भार टाकल्याने मज्जातंतूंवर दाब आल्यास, विशेषतः करंगळीत आणि तिच्या शेजारच्या बोटात मुंग्या येणे किंवा बधिरता येऊ शकते. झोपताना कोपर जास्त वाकवून ठेवणे टाळा.
व्हिटॅमिनची कमतरता आणि मधुमेह
व्हिटॅमिन बी१२ ची कमतरता आणि मधुमेहामुळे नसांना इजा होऊ शकते. त्यामुळे हात किंवा पायांना बधिरता, जळजळ आणि मुंग्या येऊ शकतात. जर हातातील बधिरता कायम राहिली, जास्त काळ टिकली किंवा हातामध्ये अशक्तपणा जाणवत असेल, तर डॉक्टरांचा सल्ला घ्या. जर हातातील अचानक आलेल्या बधिरतेसोबत चेहऱ्यावर अशक्तपणा, बोलण्यात अडचण किंवा शरीराच्या एका बाजूला अशक्तपणा जाणवत असेल, तर तत्काळ आपत्कालीन मदत घ्या.
घरी करावयाचे सोपे उपाय
झोपण्याची योग्य पद्धत : स्वतःच्या हातावर डोके ठेवून किंवा मनगट पूर्णपणे वाकवून झोपणे टाळा. मानेला योग्य आधार देणारी आणि पाठीचा कणा सरळ ठेवणारी उशी वापरा.
हळुवार हालचाल करा : सुन्न झालेला हात किंवा पाय जोरात झटकण्याऐवजी बोटे वाकवणे, टाच फिरवणे किंवा हलका स्ट्रेचिंग व्यायाम करून रक्ताभिसरण वाढवा.
पुरेसे पाणी व सक्रियता : शरीरात पाण्याचे प्रमाण कमी असणे आणि दिवसभर एकाच जागी बसून राहण्यामुळे रात्री पायात क्रॅम्प्स येतात. त्यामुळे मुबलक पाणी प्या आणि दिवसभर सक्रिय राहा.
