बालमूर्तिकारांसाठी पर्यावरणपूरक गणेशमूर्ती स्पर्धेचे १ ऑगस्ट रोजी राजापुरात आयोजन

राजापूर : हिंदुहृदयसम्राट बाळासाहेब ठाकरे यांच्या जयंतीनिमित्त शिवसेना (उद्धव बाळासाहेब ठाकरे) पक्षातर्फे लांजा-राजापूर-साखरपा विधानसभा मतदारसंघातील विद्यार्थ्यांसाठी पर्यावरणपूरक गणेशमूर्ती तयार करण्याची स्पर्धा आयोजित करण्यात आली आहे. ही स्पर्धा १ ऑगस्ट रोजी राजापूर येथील डॉ. बाबासाहेब आंबेडकर भवन येथे होणार आहे.
पर्यावरणपूरक गणेशोत्सवाची संकल्पना रुजविणे आणि विद्यार्थ्यांमधील कलागुणांना प्रोत्साहन देणे हा या स्पर्धेचा मुख्य उद्देश असल्याचे आयोजकांनी सांगितले. परिसरातील जास्तीत जास्त बालमूर्तिकारांनी या स्पर्धेत सहभागी व्हावे, असे आवाहन करण्यात आले आहे.
स्पर्धा इयत्ता पाचवी ते सातवी आणि आठवी ते दहावी अशा दोन गटांत होणार आहे. स्पर्धकांना गणेशमूर्ती तयार करण्यासाठी आवश्यक असलेली शाडू माती आयोजकांकडून उपलब्ध करून दिली जाणार असून, इतर आवश्यक साहित्य स्पर्धकांनी स्वतः आणायचे आहे. तयार करण्यात येणाऱ्या गणेशमूर्तीची उंची ९ ते ११ इंच असणे आवश्यक आहे.
स्पर्धा सकाळी १०.३० ते दुपारी ३ या वेळेत होणार असून, दोन्ही गटांतील विजेत्यांना आकर्षक पारितोषिके, सन्मानचिन्हे आणि प्रमाणपत्रे देऊन गौरविण्यात येणार आहे. पारितोषिक वितरण समारंभ सायंकाळी ४ ते ६ या वेळेत होईल.
स्पर्धेत सहभागी होऊ इच्छिणाऱ्या विद्यार्थ्यांनी २० जुलैपूर्वी नाव नोंदणी करून सहभाग निश्चित करावा, असे आवाहन आयोजकांनी केले आहे.