रत्नागिरीतील पोस्ट ऑफिस समोरील वाहनतळाच्या मुख्य रस्त्यावर भला मोठा खड्डा; नगरपालिकेच्या दुर्लक्षामुळे वाहने फसण्याचे प्रकार वाढले

रत्नागिरी (विशेष प्रतिनिधी):
रत्नागिरी शहरातील अत्यंत वर्दळीच्या मानल्या जाणाऱ्या मुख्य पोस्ट ऑफिस समोरील वाहनतळाच्या प्रवेशद्वारावरच एक भला मोठा धोकादायक खड्डा पडला असून, प्रशासकीय दुर्लक्षामुळे वाहनधारकांना दररोज नाहक मनस्ताप सहन करावा लागत आहे. गेल्या अनेक दिवसांपासून हा खड्डा उघड्यावर आहे, तरीही नगरपालिका प्रशासनाकडून यावर कोणतीही कारवाई करण्यात आलेली नाही. प्रशासनाच्या या ढिम्म कारभारावर नागरिकांनी आणि वाहनधारकांनी तीव्र नाराजी व्यक्त केली आहे.
गाड्या अडकून पडण्याचे प्रमाण वाढले
रत्नागिरीच्या या मध्यवर्ती वाहनतळामध्ये शासकीय कामांसाठी, पोस्ट ऑफिसमध्ये येणारे नागरिक, व्यापारी आणि स्थानिक रहिवाशांच्या दररोज शेकडो चारचाकी व दुचाकी गाड्या पार्क केल्या जातात. परंतु वाहनतळाकडे जाणाऱ्या रस्त्यावरच पडलेल्या या मोठ्या खड्ड्यामुळे वाहने चालवणे अत्यंत कठीण आणि धोक्याचे बनले आहे. नुकतीच या वाहनतळात प्रवेश करताना एक महिंद्रा थार ही चारचाकी गाडी या खड्ड्यात अडकल्याची घटना घडली. गाडीचे चाक खड्ड्यात खोलवर रुतल्याने ती बाहेर काढताना चालकासह उपस्थित नागरिकांची मोठी कसरत झाली. असे प्रकार दररोज घडत असून यामुळे वाहनांचे मोठ्या प्रमाणावर आर्थिक नुकसान होत आहे.
नगरपालिकेचे डोळे उघडणार कधी?
“हा खड्डा गेली अनेक दिवस जसाच्या तसाच आहे, तरीही नगरपालिकेच्या अधिकाऱ्यांना किंवा कर्मचाऱ्यांना तो कसा दिसत नाही?” असा उद्विग्न सवाल आता नागरिक विचारत आहेत. रात्रीच्या वेळी तर अंधारामुळे हा खड्डा न दिसल्यास मोठा अपघात घडण्याची दाट शक्यता निर्माण झाली आहे. शहरातील प्रमुख ठिकाणी जर रस्त्याची ही दुरवस्था असेल, तर प्रशासकीय यंत्रणा काय काम करत आहे, असा सवाल नागरिकांमधून उपस्थित केला जात आहे.
तातडीने दुरुस्ती करण्याची मागणी
एकीकडे नागरिक नियमित कर भरत असताना, दुसरीकडे मात्र त्यांना साध्या पायाभूत सुविधांसाठी आणि सुरक्षित रस्त्यांसाठीही झगडावे लागत आहे. रत्नागिरी नगरपालिकेच्या संबंधित विभागाने कोणत्याही मोठ्या अपघाताची वाट न पाहता या समस्येकडे त्वरित गांभीर्याने लक्ष द्यावे. वाहनतळाच्या रस्त्यावरील हा धोकादायक खड्डा तात्काळ बुजवून रस्ता सुरळीत करावा आणि वाहनधारकांना दिलासा द्यावा, अशी जोरदार मागणी स्थानिकांनी केली आहे.